Xulka Argentina ayaa iska xaadiriyay wareega 8da ee Koobka Adduunka ka dib markii ay 2-1 ku dubteen xulka Australia ciyaar xiiso badneyd oo labada xul dhexmartay.
Argentina ayaa qeybtii hore kubada inteeda badan iska heysatay, laakiin ma aysan abuureynin fursado badan halka Australia ay ku soo tashadeen inay difaac galaan.
Lionel Messi oo ciyaarayay kulankii KUMAAD ee waayihiisa ciyaareed ayaase boorka ka jafay ciyaarta isagoo gool qurux badan oo uu ka dhaliyay meel 15 mitir u jirta goolka uu hogaanka ugu dhiibay Argentina daqiiqadii 35aad.
Waxay aheyd markii ugu horeysay abid ee Lionel Messi uu gool ka dhaliyo meel ka baxsan wareega guruubyada Koobka Adduunka.
Qeybtii hore goolkaas ayaa lagu kala nastay, markii la isku soo laabtay Argentina ayaa baadigoob ugu jirtay inay hesho goolkii ay ku xaqiijisan laheyd guusha.
Daqiiqadii 57aad goolhayaha xulka Australia ayaana hadiyad u siiyay goolkii ay raadinayeen, ka dib markii uu ka daahay inuu bixiyo baas loo soo celiyay, waxaana ka dafay oo ka dhaliyay Alvarez.
Daqiiqadii 77aad Australia ayaa heshay gool ay hurdada uga kaceen markii Goodwin uu darbo ku dharbaaxay Fernandez taasoo dib martay goolhaye Martinez. Waxaa goolka loo qoray inuu iska dhaliyay Fernandez.
Goolkaan ay soo ceshatay Australia ayaa xamaasad u yeelay ciyaarta iyadoo Australia ay gashay rajo aheyd inay barbareyn karaan halka Messi uu mar walba uu kubad jiido uu halis ku ahaa goolka Australia.
Kabtanka Argentina ayaa wacdarro dhigay kulankaan, marka laga soo tago inuu gool dhaliyay hadana wuxuu ahaa halista weerarka Argentina isagoo abuuray fursado badan. 10kii daqiiqo ee ugu danbeeyay ciyaarta kaliya labo fursadood oo gool loo fishay ayuu u dhigay Martinez oo qasaariyay.
Ilbiriqsii ugu danbeeyay Australia ayaa heshay fursad gool loo fishay oo ay ciyaarta ku barbareyn kareen laakiin goolhaye Martinez ayaa badbaadiyay.
Ciyaarta waxay ku soo dhamaatay 2-1 oo ay Argentina ku dubatay Australia, waxayna wareega 8da isku balansadeen xulka Netherlands oo maanta ka soo gudbay xulka Mareykanka.
Boyka
Abshir