Khabiirka ciyaaraha Paul Merson ayaa dareensan in Arsenal ay ka dhaadhici doonto sallaank figta sare ee horyaalka Premier League, isla markaana ay xataa layaab noqon doonto haddii ay afarta sare ka mid noqdaan, sababtoo ah waxa soo gaadhay jug ay adag tahay inay kasoo kabtaan.
Gunners oo hoggaanka horyaalka ku haysa shan dhibcood oo ay ka horreyso Man City oo labaad fadhida ayaa qaadanaysa xilli ciyaareedkeedii ugu fiicnaa muddo 20 sannadood ah, waxaanay ku hamiyeysaa inay ku guuleysato horyaalka Premier League oo ay ugu dambaysay sannadkii 2003.
Mikel Arteta oo ay kooxdiisu berri oo Isniin ah la ciyaari doonto West Ham United ayaa u baahan inay guul dib ugu furato horyaalka kaddib lix usbuuc oo fasax ahaa, hase yeeshee waxay la dhibaatoon doonaan sidii ay u buuxin lahaayeen booska uu ka dhaawacmay Gabriel Jesus.
Weeraryahanka reer Brazil oo kusoo dhaawacmay Koobkii Adduunka ayaa garoomada ka maqnaan doona illaa bisha March, waana sababta uu Paul Merson ugu dooday in Gunners ay simbiririxasho degdeg ah bilaabi doonto.
25 jirkan oo ay Gunners £45 milyan oo Gini kaga soo iibsatay Man Ctiy xagaagii ayaa shan gool u dhaliyey, lix kalena caawiye ka noqday, taas oo ka dhigan in 14 ciyaarood oo horyaalka ah uu ku lug yeeshay 11 gool oo ay kooxdiisu dhalisay, balse xalka degdegga ah ee uu Mikel Arteta haysto ayaa ah Eddie Nketiah.
Merson oo maqaal ku qoray wargeyska Daily Star ayaa yidhi: “Waxa aan isku dayaa in aanan wax badan ka akhriyin kulamada saaxiibtinimo sababtoo ah waxa walaac weyn igu haya in Arsenal ay hadda isku hallaynayso Eddie Nketiah marka uu Premier League soo laabto. Siddeed dhibcood oo nadiif ah ayay tegi karaan haddii ay garaacaan West Ham ka hor inta aanay Manchester City ciyaarin, balse kuma farxi doonaan oo kuma guuleysan doonin horyaalka Gabriel Jesus la’aantii.
“Way adag tahay sababtoo ah uma aanu dhalinayn goolal badan laakiin waxa uu ahaa ciyaartoy wax qabad badan. Haddii uu maqnaado saddex bilood, aniga layaab ayay igu noqon doontaa haddii ay Arsenal afarta sare kasii mid ahaato.”
Paul Merson oo qoraalkiisa sii wata ayaa intaa raaciyey: “Anigu ma arkayo halka ay goolashoodu ka imanayaan, laga yaabaa in aan qaldanahay.”
