Kooxda kubadda cagta Arsenal ayaa saacadaha soo socda la filayaa inay dhamaystirto heshiiska xiddiga reer Belgium ee Leandro Trossard oo ay kala soo wareegayso Brighton & Hove Albion, waxaana uu qorshuhu yahay in garoonka Emirates Stadium lagu soo bandhigo ka hor ciyaarta Axadda ee Manchester United.
Mikel Arteta oo kooxdiisa hore looga afduubtay Joao Felix iyo Mudryk oo ay qaadatay Chelsea ayaa waxa uu ku faro-adaygayaa Leandro Trossard oo la sheegay inay ka bixinayaan lacag aan ka badnayn £25 milyan oo Gini.
Fabrizio Romano ayaa maanta xaqiijiyey in ay Arsenal heshiis shaqsi ah la gaadhay Trossard, haddana ay hadhsan tahay in la dhamaystiro heshiiska kooxdiisa Brighton oo ay u socdaan wada-hadallo meel fiican maraya oo la filayo in aanay waqti badan qaadanin.
28 jirkan ayay hore u dalbatay Tottenham oo ku doonaysay £12 milyan oo Gini, waxaana iska diidday Brighton oo doonaysa lacag laba-jibbaar ka badan intaas, taas oo fursad siisay Arsenal.
Brighton oo xagaagii iibisay Yves Bissouma oo £25 milyan oo Gini ugu wareegay Spurs iyo Marc Cucurell oo ay Chelsea ku qaadatay £62 milyan oo Gini, ayaa waxay haddana diyaar u noqotay inay suuqa dhigto Trossard oo ay isku dhaceen tababare De Zerbi. Waxa kale oo kasii horreeyey Ben White oo Arsenal ay kagala wareegtay £50 milyan oo Gini.
Kaddib markii ay soo baxday xogta heshiiska Leandro Trossard iyo Arsenal, waxa su’aal noqotay lambarka uu xidhan doono xiddigan reer Belgium sababtoo ah lambarkii uu jeclaa ee No.11 waxa haysta Gabriel Martinelli. Sidoo kale, Trossard oo kooxdiisii hore ee Genk u xidhan jiray No.14 ayaan bannaanayn, waxaana Arsenal ay siisay Eddie Nketiah markii uu heshiiska cusub saxeexay.
Koobkii Adduunka ee lagu qabtay Qatar, waxa uu Trossard xulkiisa Belgium u xidhnaa No.17 kaasna ma heli karo waqtigan sababtoo ah waxa haysta Cedric Soares inkasta oo la sheegayo inay suurtogal tahay in uu Soares amaah kaga tago Arsenal oo uu sidaas ku heli karayo Trossard.
Haddii No.17 uu waayo, waxa Trossard ay Arsenal kala dooransiin doontaa lambarrada kale ee bannaan No.15 oo uu lahaaAinsley Maitland-Niles oo amaah ku maqan, No.19 oo uu xidhan jiray Nicolas Pepe oo amaah lagudiray, No.20 oo uu leeyahay Nuno Tavares oo amaah ku baxay iyo No.22 oo uu Pablo Mari xidhan jiray ka hor intii aanamaahda laagu bixin. Waxa kale oo bannaan No.26, No.28, No.29 iyo No.30.
