Halyeeyga kubadda cagta Talyaaniga ee Gianluigi Buffon ayaa shaaca ka qaaday xulka uu taageersan yahay koobka aduunka xilli dalkiisu ka maqan yahay.
Buffon ayaa si lama filaan ah u sheegay in xulka uu wataa uu yahay dalka African-ka ah ee Cameroon oo Group la wadaaga Brazil, Switzerland iyo Serbia.
Talyaaniga oo uu Buffon ku meteli karayay koobka ayaa ku hadhay isreeb-reebka ay Portugal kusoo baxeen kaddib markii ay North Macedonia 1-0 kaga adkaatay kulan lama filaan ahaa.
Taas ayaa ka dhigan in xulka Azzurri uu markii labaad oo xidhiidh ah seegayo tartankaas maadaama oo ay sidoo kale 2018 ka maqnaayeen.
Si kastaba, Buffon ayaa sheegay inuu Cameroon taageersan yahay oo ay markasta u ahayd xulkiisa labaad sababtoo ah inuu ku dayan jiray halyeeyga goolhayaha ahna kabtankii mudada dheer ee dalkaas ee Thomas N’Kono.
“Markasta waxa ay ahaayeen xulkayga labaad, kooxda labaad ee aan jeclahay tan iyo koobkii aduunka ee 1982” ayuu hadalkiisa ku bilaabay Gigi.
“1990 gabi ahaanba waan taageerayay iyaga iyagoo watay ciyaartoy ay kamid yihiin Thomas N’Kono, Milla iyo Oman-Biyik kuwaas oo aniga geesiyadayda ahaa. Xulkii 1990 ee Cameroon deg-deg ayaan magacyadooda u yeedhin karaa”.
