Kooxda kubadda cagta Arsenal ayaa lagu soo warramayaa in ay la saxeexan doonto xiddiga ku dhibaatoonaya Real Madrid ee Eden Hazard, haddii ay ku guuleysan waayaan laacibka ay raadinayaan ee Mykhaylo Mudryk.
Gunners oo toddobaadyadii ugu dambeeyey waqti badan ku bixinaysay sidii ay la saxeexan lahayd Mudryk ayaa laba jeer ay Shakhtar Donetsk ka diidday dalabyo ay u gudbisay, waxaanay kooxda reer Ukraine dalbanaysaa €100 milyan oo Euro.
Wararka laga helayo waddanka Spain ayaa waxay sheegayaan, in tababare Mikel Arteta uu la saxeexan doono Eden Hazard haddii uu waayo Mudryk oo ay isku haystaan Chelsea inkasta oo ay Blues la saxeexatay Joao Felix oo galabta gaadhay magaalada London.
Warbaahinta MediaFoot ayaa sheegtay in ay xog ku hayso, in Arsenal ay diiraddeedu saaran tahay Eden Hazard oo qandaraaskiisa Real Madrid ay ka hadhsan yihiin 18 bilood laakiin ay Los Blancos diyaar u tahay inay ku fasaxdo lacag aad u hoosaysa amaba ay ogolaanayso inay amaah ku dirto illaa dhamaadka xilli ciyaareedka, isla markaana xagaaga la iibiyo.
Tababare Carlo Ancelotti ayaa la sheegay inuu ku wargeliyey Eden Hazard in aanu ka sugin boos uu ka ciyaaaro iyo waqti uu siiyo intaba, sidaas darteedna uu raadsado koox uu u wareego.
32 jirkan ayaa xilli ciyaareedkan socda waxa uu Real Madrid u dheelay toddoba kulan oo kaliya oo uu waliba intooda badan kusoo galay beddel, halka dhamaan intii uu kooxda joogayna uu u saftay 73 ciyaarood oo kaliya oo uu u dhaliyey toddoba gool iyo 11 kale oo uu caawiyey. Eden Hazard ayaa waxa sidoo kale lala xidhiidhinayaa kooxda reer Turkey ee Fenerbahce.
