Tababaraha kooxda kubadda cagta Barcelona ee Xavi Hernandez ayaa kala doortay labada ciyaartoy ee uu midkood ku beddelayo kabtanka kooxdaas ee Sergio Busuqets oo la filayo inuu iskaga tago Camp Nou dhamaadka xilli ciyaareedkan oo uu ku egyahay qandaraaskiisu.
Barcelona ayaa aad loola xidhiidhinayaa khadka dhexe ee xulka Portugal iyo kooxda Wolves ee Ruben Neves oo mar la sheegay in ay Barca xidhiidh la samaysay, sidoo kalena ogaatay qiimihiisa, hase yeeshee waxa isaguna magaciisu caan ka noqday xafiisyada maamulka Barcelona oo in muddo ah lagaga doodayay.
Xavi Hernandez ayaa kaadhkiisa ciyaaray oo qiimayn gaar ah ku sameeyey labadan ciyaartoy, ka hor intii aanu kala dooranin waxaana uu ka eegay da’da, la-jaanqaadista kubadda tiki-taka ee ay kooxdiisu ciyaarto iyo fahamka dabeecadda.
Sida uu qoray wargeyska Mundo Deportivo ee kasoo baxa Spain, tababare Xavi ayaa waxa uu doortay xiddiga reer Spain ee Zubimendi oo uu u sheegay maamulka kooxda in ay u keenaan, iskana daayaan Ruben Neves.
Zubimendi oo qandaraaskiisa Real Sociedad uu soconayo illaa laga gaadhayo sannadka 2026, ayaa waxa lagu burburin karayaa heshiiskiisa lacag gaadhaysa €60 milyan oo Euro, waxaase kula tartamaya kooxo dhawr ah oo ay ku jirto Manchester United.
Dhinaca kale, Neves ayay Barcelona ku heli kartaa lacag ka hoosaysa inta ay Real Sociedad ku xidhay Zubimendi, sababtoo ah qandaraaskiisa Wolves ayaa ku eg xagaaga 2024 oo sannad iyo badh ka hadhsan tahay, waana sababta ay kooxda horyaalka Premier League u doonayso inay iibiso ka hor inta aan la gaadhin waqtigaas si aanu bilaash ugaga tegin.
