Xulka qaranka England ayaa maanta sameeyey tababar ay iskugu diyaarinayaan kulanka adag ee Faransiiska ay Sabtida foodda isku darayaan wareegga siddeedda Koobka Adduunka.
Tababare Gareth Southgate ayaa helay dhamaan ciyaartoydiisa marka laga reebo afar ciyaartoy oo laba ay dib ugu noqdeen England, isla markaana midkood xaqiijiyey in aanu ciyaari doonin, midka kalena uu shuruudo ku xidhay inuu soo laabto iyo labada kale oo xanuun iyo dhaawac ku maqan.
Xiddigaha xulka England oo ogsoon shaqada adag ee sugaysa ee ah inay iska dhiciyaan xulka France ee ku hubaysan weerarka khatarta badan sida Mbappe, Dembele, Giroud iyo Griezmann, ayaa waxa tababarkoodii maanta kala dhantaalay laba ciyaartoy oo meel weyn kaga jira qorshaha tababare Southgate ee Koobka Adduunka.
Xiddiga khadka dhexe ee Declan Rice ayaa tababarkii maanta aan kasoo xaadirin oo ka maqnaa, kaddib markii uu ku dhacay xanuun aan faahfaahin badan laga bixin, waxaana warbaahinta Ingiriisku ay sheegtay in aan la hubin inuu taam u noqon doono ciyaarta Sabtida ee France iyo in kale.
Rice oo ay da’diisu tahay 23 jir ma ahayn ciyaartoyga kaliya ee ka maqnaa tababarkii maanta, waxaase sidoo kale aan joogin weeraryahanka kooxda Newcastle ee Callum Wilson oo la sheegay inuu ku maqan yahay dhaawac kasoo gaadhay tababarkii Isniintii.
Dhinaca kale, waxa xulka qaranka England ka maqan oo aan kusoo laabanin Raheem Sterling oo ka hor ciyaartii Senegal ee wareegga 16ka Koobka Adduunka dib ugu laabtay London kaddib markii ay budhcad hubaysan u dhacday gurigiisa oo ay xaaskiisa iyo carruurtiisu joogaan.
Sterling ayaa sheegay in aanu dib ugu laabanayn xulka England illaa inta ay boolisku damaanad qaadayaan in amniga gurigiisu uu sugan yahay oo aan mar dambe la weerari doonin.
Waxa ka horreeyey oo sababo shaqsi ah xulka England uga baxay difaaca Arsenal ee Ben White oo xidhiidhka kubadda cagta Ingiriisku uu xaqiijiyey in aanu dib usoo laaban doonin.
