Tababarka xulka qaranka France ee maanta ayaa waxa ka maqnaaday laba ciyaartoy oo muhiim ah oo aan qayb qayb ka ahayn isku-diyaarinta ciyaarta semi-finalka Koobka Adduunka ee ay iskaga hor imanayaan Morocco. Waxa kale oo aan wax kubbad ah laadin Kylian Mbappe oo isaguna qaba dhaawac.
Les Bleus oo gool cidhiidhi ah oo 2-1 ah Sabtidii kasoo gaadhay England, ayaa waxay Arbacada wada ciyaarayaan Morocco oo uu midkood iska xaadirin doono finalka.
Didier Deschamps oo mar horeba xulkiisa uu radaagaadiyey dhaawacyo oo liiskiisa ay ka baxeen Karim Benzema, Paul Pogba, N’Golo Kante iyo Christopher Nkunku oo dhamaantood tartanka seegay ayaa waxa uu maanta indhihiisa ku arkay xaalad ka walaacsiisay.
Aurelien Tchouameni oo ah halbowlaha khadka dhexe ee kubadda burburiya, isla markaana dhaliyey goolkii koowaad ee kulankii England ayaa uu soo gaadhay dhaawac muruqa ah, waxaana uu ka maqnaa tababarkii maanta.
Wargeyska L’Equipe ee kasoo baxa waddanka Faransiiska ayaa sheegay, in Tchouameni uu dhaawac ku dhamaystay ciyaartii England taasina keentay inuu seego tababarkii maanta, hase yeeshee waxa uu rajaynayaa in uu ciyaari doono kulanka Morocco oo uu taam u noqon doono.
Waxa kale oo tababarkii maanta ka maqnaa difaaca dhexe ee Dayot Upamecano oo kulankii England ka garab ciyaarayay Raphael Varane, waxaana sababta maqnaanshihiisa lagu sheegay xanuun cunaha kaga dhacay oo aan faahfaahin badan laga bixin.
L’Euqipe ma aanu sheegin in Upamecano uu soo noqon doono iyo in kale, hase yeeshee haddii uu awoodi waayo in uu soo laabto waxa beddelkiisa uu Deschamps u kala dooran doonaa Ibrahima Konate iyo William Saliba.
Dhinaca kale, Kylian Mbappe ayaa wali ka cabanaya dhaawacyo tan iyo bilowgii Koobka Adduunka uu qabay, waxaana maanta uu qaatay tababar fudud oo dhinaca jimicsiga ah, balse waxa kubbad ah ma aanu laadin.
