Manchester United uma aanay ahayn habeen wanaagsan markii ay booqdeen Crystal Palace oo ay lasoo galeen barbarro 1-1 ah, iyaga oo waqtigii dheeraadka ahaa ee lagu daray ciyaarta ay Palace keensatay goolka barbarraha.
Red Devils ayaa iska lumisay fursad ay kula wareegi lahayd kaalinta labaad ee horyaalka Premier League oo ay waliba lix dhibcood ugu jirsan lahaayeen Arsenal oo ay Axadda wada ciyaari doonaan, waxaana jallaafo u dhigtay Crystal Palace oo laba dhibcood ka lumisay taas oo ka dhigan in United ay isku dhibco yihiin Man City oo ay min siddeed dhibcood ka dambeeyaan Arsenal.
Intii ay socotay ciyaartii Selhurst Park ee xalay, laba ka mid ah ciyaartoyda Manchester United ayaa isku dhacay oo isku laayey garoonka dhexdiisa inkasta oo aanay gacan iskulaa tegin. Xiddiga dabeecadda xun ee Antony iyo laacibka caadifadda badan ee Bruno Fernandes ayaa isku dhacay qaybtii hore, waxaana iyadoo ay kaamirooyinka garoonku hayaan ku marmeen gegida dhexdeeda.
Kaamirooyinka garoonka ayaa soo qabtay daqiiqadihii ugu dambeeyey qaybta hore iyadoo Antony iyo Fernandes ay is-dhaafsanayaan ereyo cadho ka muuqato kaddib markii ay iska lumiyeen kubbad ay si fiican usoo dhiseen weerarkeeda, waxaana dhacdadan ka falceliyey taageereyaasha kubadda cagta.
Mid ka mid ah taageereyaasha ayaa kusoo qoray bartiisa Twitter-ka: “Antony iyo Bruno Fernandes garoonka ayay isku dhax caayayaan. Waan jecelahay in aan arko sidan oo kale.”
Taageere kale ayaa isaguna yidhi: “Antony iyo Bruno Fernandes waxay ku murmayaan baas qaldamay.”
Mid kale ayaa isaguna soo qoray: “Antony-oow, muran haku bilaabin Bruno Fernandes, sababtoo ah adiga ayuun baa ku guul-darraysanaya ninkaas.”
