Kooxaha isku magaalada ah ee Barcelona iyo Espanyol ayaa dhibcaha ku wadaagay garoonka Camp Nou kulan khalkhal kusoo dhamaaday oo ay laba casaan ah iyo laba gool la iskugu jawaabay, laakiin ay qosolka ku dambaysay kooxda martida ahayd ee Espanyol.
Barcelona ayaa gool la hormartay daqiiqaddii toddobaad ee bilowga ciyaarta, waxaana kubbad ay isku dhiibeen labada difaac ee Alonso iyo Christensen ay ugu dabbaal-dageen garoonkooda.
Laakiin qaybtii dabe ayaa rikoodhe loo dhigay Espanyol uu gool u beddelay Joselu ka hor intii aanay ciyaartu gelin khalkhal uu garsooruhu laba casaan ku bixiyey saddex daqiiqadood gudahood, kuwaas oo midkood uu ka laabtay.
Ciyaartan oo inteeda badan ay maamulaysay Barcelona ayaa waxa fursadobadan khasaariyey Ansu Fati iyo Lewandowski iyadoo si weyn ay u tabayeen saamaynta Ousmane Dembele oo kaydka la dhigay maadaama uu waqti dambe kasoo laabtay fasaxa Koobka Adduunka.
Ciyaarta oo lix daqiiqadood socota ayaa Barcelona loo dhigay laad xor ah oo uu gool u beddelay Marcus Alonso, waxaana uu goolkaasi ahaa midka kaliya ee ka dhashay qaybtii hore ee ciyaarta.
Alonso ayaa ku dhowaaday inuu gool labaad dhaliyo ciyaarta oo maraysa 18 daqiiqadood, waxaana kubbad uu soo dhigay Alba uu ku qabtay goolka isaga oo adeegsanaya lugtiisa bidx, isla markaana lix yard oo kaliya u jiray shabaqa balse kubadda ayuu dhinac mariyey birta.
Kooxda martida ee Espanyol ayaa niayd-jab weyn kujirtay qaybtii hore ee ciyaarta, waxaanay awoodi waayeen inay ciyaaraan kubbad fiican iyo in difacoodu uu sameeyey qalad xun oo sababay goolka koowaad ee laga dhaliyey intaba.
Markii lagu soo noqday qaybta labaad ayuu Xavi sameeyey beddel aanu mahanin, waxaana uu keenay Sergio Busquets oo qaybtii hore fadhiyey isaga oo saaray Gavi oo tamartiisii la tabay markiiba, taas oo fursad u noqotay Espanyol oo kubadda la qabsatay islka markaana weerar badan soo qaadday.
Daqiiqaddii 71aad ayaa Espanyol loo dhigay rikoodhe kaddib markii uu Alonso qalad ku galay Joselu, waxaana rikoodhahaas gool u beddelay isla laacibka keenay ee Joselu oo toogtay badhtamaha goolka halka uu goolhaye Ter Stegen isku tuuray dhinaciisa bidix.
Barcelona ayaa kaadh casaan ah lagaga saaray difaacooda Jordi Alba iyadoo garsoore Lahoz uu farraqayay kaadhadhkiisii dunidu ka yaabtay Koobkii Adduunka, hase yeeshee saddex daqiiqadood kaddib ayuu mar kale Lahoz kaadh casaan ah bixiyey, waxaanu ciyaarta ka saaray difaaca Espanyol ee Souza.
Kaadhkan labaad ayaa keenay in ciyaarta la joojiyo isla markaana la soo hubiyo Lewandowski oo ku doodayay in uu Souza madaxa ka laaday, ugu dambayntiina waxa lagu qasbanaaday in kaadhkan uu garsooruhu ka laabto markii uu ku qancay in Lewandowski aanu laad ku dhicin.
Goolhaye Alvaro Fernandez ayaa laba fursadood oo dahabi ahaa ka joojiyey Lewandowski iyo Christensen, waxaanay ciyaartu kusoo dhamaatay 1-1 ay dhibcaha ku wadaageen kooxaha isku magaalada ah.
Xavi Hernandez oo aad uga gadooday go’aamada garsooraha ayaa kaadh digniin ah lagu aamusiiyey, sidoo kalena waxa uu kursiga kydka kaadh ku siiyey Raphinha, iyadoo intii ay ciyaartu socotay uu garsoore Mateu Lahoz bixiyey 14 kaadh.
Barbarraha ay Barcelona gashay ayaa ka dhigan in ay dib ugu soo noqotay hoggaanka horyaalka oo ay la simantay Real Madrid oo xalay dhibic dhaaftay, balse waxay Barcelona ku horreysaa farqiga goolasha iyaga oo min 38 dhibcood haysta.
