Xiddiga Ghana Osman Bukari ayaa ka hadlay wararka sheegaya inuu xushmad darro u muujiyay Cristiano Ronaldo ka dib markii uu isticmaalay dabaaldegiisa “Siu” kulankii ay Portugal 3-2 ku badisay.
Bukari oo bedelay Mohammed Kudus qeybtii labaad ayaa rajo soo geliyay Ghana dhamaadkii ciyaarta markii uu uu kubad madax ku dabamariyay goolhayaha Portugal Diogo Costa.
23 jirkaan ayaa u dabaaldegay goolkiisa isagoo sameeyay dabaaldega uu caanka ku yahay kabtanka Portugal ee ee “Siu”.
Ronaldo oo durbadiiba ay kaamirada qabatay ayaa u muuqday mid ka careysan goolka laga dhaliyay xulkiisa iyo dabaaldega uu sameeyay xiddiga reer Ghana oo dad badan ay u fasirteen inay aheyd mid uu ku durayo Ronaldo.
Si kastaba, xiddiga Ghana ayaa sheegay inuu xakameyn waayay dareenkiisa madaama uu gool u dhaliyay wadankiisa, wuxuuna sheegay inay qalad tahay wararka sheegaya inuu xushmad darro u muujiyay Ronaldo.
“Waxaan arkay in dabaaldegeyga falcelin badan laga bixiyay iyadoo la sheegayo inaan xushmad darro u muujiyay Cristiano Ronaldo” ayuu Bukari ku soo qoray baraha bulshada.
“Taasi waxba kama jiraan. Waxaan xakameyn waayay dareenkeyga durbadii aan gool u dhaliyay wadankeuga kulankeygii ugu horeeyay Koobka Adduunka taasoo iga keentay dabaaldega.
“Sida la ii soo koriyay iima ogolaaneyso inaan xushmad darro u muujiyo dadka iga waa weyn iskaba daa qof aan ku daydo. Waad ku mahadsan tihiin taageeradiisa, waxaana diirada saarayaa ciyaarta xigta.”
Portugal ayaa kulankeeda labaad ee wareega guruubka waxay Lusail Stadium kula ciyaareysaa Uruguay.
Ghana oo haatan u hooseysa Group H waxay isla Isniinta la ciyaarayaan xulka South Korea.
