Real Madrid ayaa habeen hore guuldarro 3-1 ah kala kulantay dhigeeda uu xifaaltanka kubaddeed kala dhaxeeyo ee Barcelona oo 3-1 kaga qaaday Spanish Supercopa.
Barcelona ayaa kulanka ku hoggaaminaysay 3-0 kaddib goolal ka yimid Pablo Gavi, Robert Lewandowski iyo Pedri kahor inta uusan Karim Benzema gool usoo celin Madrid.
Los Blancos ayaa kulankaas ka ogaaday wax badan iyo sida ay boosas badan ugu baahan yihiin inay iska soo xoojiyaan suuqa xagaaga soo socda.
Booska ugu muhiimsan ee ay liidashada ka dareemeen kulankaas ayaa ah daafaca midig oo uu Dani Carvajal si weyn ugu fashilmay.
Wargeyska Marca ayaa sheegaya in Madrid ay ka werwersan tahay qaab ciyaareedka 31 sano jirkaas oo xilli ciyaareedkii hore si fiican ku dhammaystay kana si fiican ku bilawday balse kaddib dhaawac gaadhay aan u muuqan midkii hore.
Wargeyska Marca ayaa sidoo kale Carvajal aragtidooda ka dhiibtay iyagoo ku dhaliilay inuusan jidh ahaan sidii hore ahayn gaar ahaana celin karin xiddigaha xawaaraha sarre leh.
Taageerayaasha Real Madrid ayaa doonaya oo dalbanaya in kooxda da’yarta laga soo dalacsiiyo Vinicius Tobias oo kaga yimid dhinaca Shakhtar Donestk daafaca midigna wacdarro uga dhigaya Castilla B.
Ugu dambayn, wargeyska kale ee COPE ayaa sheegay in muhiimada koowaad ee Los Blancos xagaaga dambe ay tahay saxeexa khadka dhexe ee Borussia Dortmund ee Jude Bellingham iyo daafac midig oo cusub.
