Waxa u muuqda mid xoogaystay tartanka loogu jiro saxeexa laacibkii khadka dhexe ee xulka Morocco ee Koobkii aduunka ee Azzedine Ounahi kaas oo haatan ka tirsan kooxdiisa Angers ee horyaalka Ligue 1.
Ounahi ayaa kamid ahaa xiddigaha magacooda sida weyn loogu bartay koobkii aduunka kaddib markii ay Morocco noqotay lama filaankii tartanka iyagoo booska koowaad kaga soo baxay Group ay kula jireen Croatia, Belgium iyo Canada kahor inta aysan dhaafin Spain iyo Portugal.
Ounahi oo tartanka wacdarro ka dhigay ayaa degdeg loola xidhiidhiyay kooxo badan oo laga xusi karo Barcelona, Marseille, Napoli iyo Leicester City.
Sida uu sheegayo wargeyska ree France ee TyC Sports, kooxda u muuqata inay gacanta ku dhigtay saxeexa Azzedine ayaa ah kooxda hoggaanka u haysa horyaalka Talyaaniga ee Napoli.
Warbixinta wargeyska ayaa sheegaysa in Napoli ay 20 Milyan oo euro ka bixinayso saxeexa Ounahi isla markaana ay macquul tahay inay isla markiiba amaah ugu celiso kooxda Angers amaba Leicester.
Ounahi oo hore nooca kooxda uu dooran doono uga hadlayay ayaa yidhi “Waxaan mustaqbalkayga dooran doonaa anigoo ku salaynaya mashruuca ciyaareed ee ugu wanaagsan, waa waxa ugu muhiimsan ee aan dhaqaaqayga xiga ku go’aamin doono”.
