Kylian Mbappe ayaa ugu codeeyay Cristiano Ronaldo inuu yahay xiddigii ugu weynaa abid ee kubada cagta ka dib markii uu faalo ka bixiyay qoraal uu xiddiga reer Portugal soo dhigay Instagram.
Ronaldo iyo xulkiisa Portugal ayaa shalay oo Sabti aheyd waxaa Koobka Adduunka ka reebtay Morocco oo noqotay xulkii ugu horeeyay ee Afrika ee gaara semi-finalka Koobka Adduunka.
37 jirkaan ayaa ku guuldareystay inuu saameyn ku yeesho ciyaartii shalay oo uu bedel ku soo galay.
Waxay taasi keentay in Ronaldo uu oohin uga baxo garoonka iyadoo ay tahay koobkii shanaad ee uu niyadjab uga baxo.
Maanta oo Axad ah ayuu weeraryahankii hore ee Manchester United baraha bulshada soo dhigay qoraal uu uga falcelinayo ciyaartaas isagoo sheegay in Koobka Adduunka uu ahaa riyadiisii ugu weyneyd abid.
Dabcan dad badan ayaa faalo ka bixiyay qoraalkiisa, waxaana ka mid ah xiddiga Faransiiska Kylian Mbappe.
Weeraryahanka wuxuu soo dhigay seddex sawirada yaryar ee loo yaqaano emoji oo kala ahaa taajka boqorka, gacmo isa saarka iyo sawirka ariga oo u taagan GOAT (Greatest Of All Time) oo micnaheedu yahay Xiddigii Ugu Weynaa Abid.
Taageerayaasha Ronaldo ayaa si gaar ah uga farxady qoraalka Mbappe madaama xiddiga Faransiiska ay PSG iska garab ciyaaraan ninka ay Ronaldo xafiiltamaan ee Lionel Messi oo aan jecleysan doonin in Ronaldo loogu codeeyo xiddigii abid ugu weynaa kubada cagta.
Mbappe ayaase ku soo koray isagoo taageere u ah weeraryahankii hore ee Real Madrid, sawiradiisa ayaa ugu dheganaan jiray darbiga qolkiisa jiifka markii uu 13 sanno jir ahaa.
