Weeraryahanka Faransiiska iyo kooxda Paris Saint-Germain ayaa wacdarro ka dhigaya Koobka Adduunka ee 2022 isagoo durbaba loo arko mid ka mid ah xiddigaha kubada cagta ee ugu fiican dunida.
Mbappe ayaa maanta xulkiisa France u soo saaray wareega sideed dhamaadka isagoo dhaliyay labo gool oo cajiib ah islamarkaana caawiye ka ahaa gool kale.
Xiddiga Faransiiska waxa uu durbaba gooldhalinta Koobka Adduunka ee 2022 ku hogaaminayaa shan gool isagoo durbaba dhaafay wadarta goolashii uu dhaliyay Koobkiisii Adduun ee ugu horeeyay ee 2018 oo uu France ku hogaamiyay koobka markaasoo uu 4 gool dhaliyay.
Mbappe wuxuu jabiyay rikoodhkii muddo dheer u yaalay boqorka kubada cagta Pele kaasoo ahaa inuu dhaliyay wax ka badan sideed gool oo Koob Adduun ah ka hor inta uusan gaarin da’da 24 sanno jir.
Wadar ahaan labadii Koob Adduun ee uu ka qeyb qaatay Mbappe wuxuu dhaliyay SAGAAL gool, wuxuuna dhashay 1998dii.
Labadii gool ee uu maanta dhaliyay waxay keentay inuu Mbappe ka sarre maro halyeeyadii ugu waa weyn aa kubada cagta.
Sagaalkiisa gool ee Koob Adduun waxay ka sareeyaan goolashii ay Koobka Adduunka ka dhaliyeen Diego Maradona, Cristiano Ronaldo, Suárez, Neymar, Thierry Henry, Rivaldo iyo Kempes.
Maradona wuxuu Koob Adduun ka dhaliyay 8 gool 21 kulan uu saftay halka Cristiano Ronaldo uu dhaliyay 8 gool 20 kulan uu saftay.
Waxay kaliya haatan isku goolal yihiin Lionel Messi oo isna dhaliyay sagaal gool oo Koob Adduun ah laakiin Messi wuxuu dheelay seddex Koob Adduun kale oo uusan Mbappe ciyaarin.
Mbappe ayaa sidoo kale isha ku haya rikoodhka Pele oo 12 gool ka dhaliyay Koobka Adduunka 14 kulan uu saftay.
