Weeraryahanka reer France ee Kylian Mbappe ayaa markii ugu horreysay hadlay kaddib guul-darradii Koobka Adduunka ee Argentina ay rikoodheyaasha kaga qaadday Koobka, waxaana uu laacibkani ballan-qaad u sameeyey taageereyaasha xulka Faransiiska.
Mbappe oo saddex gool dhaliyey ciyaartii finalka ayaa xulkiisa lagaga badiyey rikoodheyaal iyadoo goolhaye Emiliano Martinez uu laba rikoodhe ka badbaadiyey shabaqa Argetnian.
23 jirkan ayaa ku guuleystay abaal-marinta kabta dahabka ah isaga oo dhaliyey siddeed gool, waxaana uu ballan-qaaday inay soo laaban doonaan iyaga oo ka xooggan intii hore Koobka Adduunka ee 2026 ee afar sannadood kaddib qabsoomaya.
Qoraal kooban oo uu soo dhigay bartiisa Instagram maanta ayaa uu Kylian Mbappe ku yidhi: “Waanu soo laaban doonaa.” Waxa kale oo uu raicyey calanka Faransiiska iyo sawir emoji ah oo uu ducaynayo.
Si kastaba, Kylian Mbappe ayaa kabta dahabka ah ku garaacay Lionel Messi oo isaguna toddoba gool saxeexay, waxaana uu laacibkani fursad weyn u haystaa inuu jabiyo rikoodhka gool-dhalinta Koobka Adduunka sababtoo ah da’diisa oo 23 jir ah ayaa uu haystaa 12 gool oo Koobka Adduunka ah, taas oo ka dhigan inuu afar gool oo kaliya ka dambeeyo Miroslav Klose oo 16 gool ku haysta rikoodhka ciyaartoyga ugu goolasha badan tartanka.
