Tababarihii hore ee Chelsea ee Thomas Tuchel ayaa la sheegay inuu dib ugu soo noqonayo horyaalka waddanka Ingiriiska ee Premier League oo loo magacaabayo mid ka mid ah kooxaha waaweyn ee ka dhisan magaalada London/
Tuchel ayaa shaqo la’aan ahaa tan iyo bishii September oo si lama filaan ah shaqada ay uga caydhisay Chelsea oo mulkiilaheeda cusub ee Todd Boehly ay isku fahmi waayeen sida kooxda loo maamulayo.
49 jirkan oo Chelsea u qaaday Champions League sannadkii 2021 ayaa lala xidhiidhinayaa kooxo badan oo Yurub ah, laakiin waxa hadda ugu cadcad Tottenham oo ay wararku sheegayaan in uu ka tegi doono Antonio Conte dhamaadka xilli ciyaareedkan.
Wargeyska Evening Standard ayaa qoray, Tottenham ayaa si dhow ula socota Tuchel, waxaanay doonayaan in ay u bandhigaan qandaraas dib ugu soo celinaya magaalada London dhamaadka xilli ciyaareedkan, haddii uu Antonio Conte kusii adkaysto in aanu saxeexin heshiis cusub oo ay u bandhigtay Spurs.
Conte ayaa marar badan ka cadhaysiisay taageereyaasha kooxdiisa oo uu u sheegay in xataa aanay macquul ahayn in ay ka mid noqdaan afarta sare ee xilli ciyaareedkan, iyaga oo Khamiistana la ciyaari doona Manchester City oo hddii ay ka bidiso hoos ugu ridi karta kaalmaha siddeedaad ama sagaalaad.
Tottenham ayaa haysata dookh ah in ay 12 bilood ku kordhin karto heshiiska Conte ee hadda laakiin lama filayo in uu 53 jirkani sii joogo London.
