Kooxda heerka labaad ee dalka Ingariiska Convertry City ayaa hooy la’aan ay ku dhacday ka dib markii shirkadii iska laheyd garoonkii ay ku ciyaarayeen ay dalbadeen inay garoonka isaga baxaan.
Mike Ashley oo ahaa milkiilihii hore ee kooxda ingariiska Newcastle ayaa iibsaday garoonka Conventry Building Society Arena bishii la soo dhaafay.
Laakiin durbaba wuxuu qaaday talaabo lala yaabay isagoo garoonka ka saaray kooxdii ku ciyaareysay inkastoo ay diyaar u ahaayeen inay iska bixiyaan lacagta kirada.
Shirkada garoonka iska leh ayaa sheegtay in kooxda Conventry City aysan xaq u laheyn inay isticmaasho garoonka, waxaana loo sheegay kooxda heerka labaad in la siinayo waqti ay ku guuraan iyadoo kulankooda xiga ee martida loo noqonayo ay la ciyaarayaan kooxda Swansea 17ka bishan December.
BBC ayaa sheegtay in madaxda kooxda lagu wargeliyay Jimcihii inay soo celiyaan furayaasha iyo kaararka lagu galo garoonka.
Shirkada garoonka iska leh ayaa diiday inay ixtiraamto hishiiskii hore ay kooxda ku deganeyd garoonka, madaama shirkadii laga iibsaday ay noqotay mid musalaftay bishii Oktoobar.
Garoonka waxaa la dhisay sannadii 2005 markaasoo Conventry ay ka ciyaareysay isla horyaalka heerka labaad.
Ma ahan markii ugu horeysay ee garoonkan laga baxsado koxdaan. Sannadkii 2013 waxay si ku meel gaar ah ugu guureen garoon yar ka dib markii ay isku dhaceen milkiilayaasha garoonka.
Sidoo kale waxay sanadkii 2019 u guureen garoonka kooxda Birmingham City ee St Andrews Stadium ka dib markii ay iska bixin waayeen lacagta kirada.
