Tababaraha xulka qaranka Portugal ee Fernando Santos ayaa shaaciyey inuu u cadhaysan yahay Cristiano Ronaldo oo uu dhibsaday sida uu u dhaqmay markii uu xulka dalkaasi tegay waddanka Qatar, xilligaas oo laacibkani uu ku mashquulay heshiiskiisii Manchester United ee la kansalay.
Ronaldo ayaa waxa la sheegay in ciyaartoyda xulka dalkiisa ay qaarkood is-khilaafeen gaar ahaan Joao Cancelo, taas oo salka ku haysay khilaafkii u dhexeeyey kooxdiisa Manchester United ee uu sababay waraysigii uu bixiyey.
37 jirkan ayaa abuuray hadal-hayn badan markii uu waraysi xaasaasi ah siiyey Piers Morgan, waxaanay taasi ku keentay in indhaha oo dhan ay kusoo wada jeedsadaan oo xulku uu lumiyo niyad-samaantii, halka saxaafadduna ay ciyaartoyda iyo tababaraha marka ay shirarka jaraa’id yimaaddaan ay su’aalo ku saabsan arrinta Ronaldo weydiinayaan.
Tababare Fernando Santos oo maanta saxaafadda la hadlayay ka hor ciyaarta Switzerland ee Salaasada, ayaa waxa uu sheegay in uu ka cadhooday in Ronaldo uu xilligan xaasaasiga ah bixiyo waraysi abuura xiisad oo ciyaartoyda ka lumiya diiradda, waxaanu yidhi: “Waxa haboonayd in su’aashan la weydiiyo Ronaldo, laakiin anigu waxa anigu kuma faraxsani arrintaas.”
