Kevin de Bruyne ayaa aaminsan in Erling Haaland uu jabin doono rikoodhka 800 gool ee Cristiano Ronaldo islamarkaana uu noqon doono mid ka mid ah gooldhaliyayaasha ugu fiican abid.
Xiddiga reer Norway ayaa ku bilowday noloshiisa Manchester City si cajiib ah isagoo Khamiistii dhaliyay goolkiisii 24aad ee xilli ciyaareedka kulankii Carabao Cup ee ay 3-2 kaga badiyeen Liverpool.
Inkastoo uu kaliya 22 sanno jir noqday xagaagii hadana waxa uu durba dhaliyay 180 gool 224 kulan uu saftay.
Kevin de Bruyne ayaa aaminsan in Erling Haaland uu kor u dhaafi doonto Cristiano Ronaldo kaasoo ah xiddiga ugu goolasha badan abid isagoo dhaliyay 819 gool, halka Lionel Messi uu dhaliyay 793 gool.
KDB ayaa yiri: “Haaland wuxuu dhalin doonaa 600, 700 ama 800 haddii uu taam ahaado islamarkaana uu sameeyo waxyaabaha uu sameynayo haatan.”
Wuxuu hadalkiisa raaciyay: “Erling weli wiil da’ yar oo nolosha ku riyaaqaya – laakiin si dhab ah ayuu u wajahaa kubada cagta.
“Wuxuu jecel yahay gooldhalinta, waa wax isaga u gaar ah.
“Aad ayay u adag tahay in lala barbardhigo weeraryahanadii aan la soo ciyaaray sababtoo ah aad ayay u kala duwan yihiin.
“Dabcan hal boos ayay ka wada ciyaaraan laakiin qaar waa kuwa awood jireed leh, halka qaar ay yihiin kuwa xawaare dheereeya oo goolasha u dhalin kara si baashaal ah.
“Haaland wuxuu ku waalan yahay goolasha, wuuna dhaafi karaa rikoodh kasta oo gooldhalin ah.”
