Kooxda kubadda cagta Liverpool ayaa dib ugu laabanaysa suuqa iibka ciyaartoyda toddobaad kaddib markii ay dhamaystirtay saxeexa weeraryahanka reer Holland ee Cody Gakpo oo ay £38 milyan oo Gini kagala soo wareegtay PSV Eindhove.
Reds oo guul-darro xanuun kulul xalay kala soo kulantay Brentford oo kusoo karbaashtay 3-1 ayaa waxa la sheegay in tababare Jurgen Klopp uu ku qancay in ay qasab tahay in ay la saxeexdaan khad dhexe oo adag, si ay kaalinta afraad ugu dagaallami karaan.
Brentford oo khadka dhexe iyo difaaca Liverpool si fudud ku burburisay ayaa waxay soo saartay gol-daloolooyin badan oo illaa uu tababare Jurgen Klopp xal u helo aanu la tartami karayn kooxaha hadda ka sarreeya, sida Arsenal iyo Manchester City.
Sida uu qoray wargeyska The Telegraph ee kasoo baxa Ingiriiska, Liverpool ayaa waxa guul-darradii Brentford kaddib ay dib ugu laaban doontaa xiddiga kooxda Wolves ee Matheu Nunes oo ay xagaagii hore isku dayeen inay la saxeexdaan laakiin ay Wolves uga hormartay oo ay kasoo qaadatay Sporting Lisbon.
Matheu Nunez ayay Wolves kasoo bixisay lacag gaadhaysa £42.2 milyan oo Gini, waxaana horeba ammaanta uga xajisan waayey tababare Pep Guardiola oo ku sifeeyey ‘mid kamidah ciyaartoyda ugu wanaagsan dunida ee khadka dhexe.
The Telegraph waxa uu intaa ku daray, in Liverpool ay ku heli karayso Nunez lacag gaadhaysa £44 milyan oo Gini.
