Weeraryahankii hore ee xulka Argentina ee Sergio Aguero oo qayb weyn ka qaatay dabaaldegii Koobka aduunka ee dalkaas xalay ayaa kaddib ciyaarta baraha bulshada ka caayay da’yarka khadka dhexe ee France ee Eduardo Camavinga.
Kulankaas oo kusoo dhammaaday 3-3 ahaana mid aad u xiiso badan ayay Argentina rigoorayaal ku adkaatay iyadoo ugu dambayn riyadii Lionel Messi rumawday.
Camavinga ayaa kamid ahaa xiddigaha Les Bleus ee isbedelka weyn ku keenay ciyaarta isagoo bedel ku yimid xilli 2-0 lagu hoggaaminayay.
Eduardo oo asal ahaan khad dhexe ah ayaa kulankaas daafaca bidix ka dheelayay waxaana la arkayay isaga oo dhawr mar kubadda kula dagaalamaya Lionel Messi.
Si kastaba, kulanka kaddib Sergio Aguero oo bartiisa Instagram muuqaal toos ah kasoo galay gudaha qolka labiska Argentina ayaa afxumo kula kacay da’yarkaas isagoo yidhi “Camavinga, midka foosha xun leh”.
Jamaahiirta barta Twitter-ka ayaa degdeg uga falceliyay muuqaalkaas oo baahay iyagoo u sheegay Aguero inuu sidooda oo kale daawade ka ahaa tartanka oo ay tahay inuu is dajiyo.
