Kooxda kubadda cagta Liverpool ayaa mar kale ku celinaysa xeeladdii ay u adeegsatay Darwin Nunez iyo Sadio Mane, si ay ula saxeexato xiddigaha wacdaraha ka dhigaya Koobka Adduunka ee guusha ku hoggaamiyey xulka dalkiisa Ghana ciyaartii ay 3-2 ku garaaceen Koonfur Korea ee Mohammed Kudus.
Xiddigan khadka dhexe uga ciyaara kooxda Ajax, ayaa waxa uu isku muujiyey labadii ciyaarood ee xulkiisa ee Koobka Adduunka oo uu dhaliyey laba gool, waxaana uu burburiyey difaacayahannada Koonfur Korea oo uu laba jeer shabaqooda u weydaartay.
Liverpool ayaa muddo dheer indhaha ku haysay Mohammed Kudus, waxaana ciyaartii Portugal ay u direen shaqaalahooda suuqa oo soo daawaday, isla markaana qiimayn ku sameeyey qaab ciyaareedka laacibkan iyo sida uu ula jaan-qaadi karayo hannaanka Jurgen Klopp ee ku dhisan weerarka.
Kudus ayaa kulankii Champions League ee Liverpool iyo Ajax ee wareeggii group-yada gool ka dhaliyey Liverpool, waxaana haddii ay ku guuleystaan saxeexiisa uu ku biiri doonaa liiska xiddigo uu Jurgen Klopp la saxeexday markii ay kooxdiisa goolal ka dhaliyeen.
Klopp ayaa xagaagii waxa uu £85 milyan oo Gini kasoo bixiyey xiddiga reer Uruguay ee Darwin Nunez oo wareeggii 16ka Champions League ee bishii April goolal ka dhaliyey isaga oo u ciyaarayay kooxda Benfica.
Sidaas oo kale waxa ahaa Sadio Mane oo Jurgen Klopp uu saxeexiisa u dhaqaaqay markii uu laba gool ka dhaliyey Liverpool xilli ciyaareedkiisii koowaad, waxaana markii uu xiddiga reer Senegal yimid Anfield uu u saftay 259 ciyaarood oo uu u dhaliyey 120 gool, ka hor intii aanu xagaagii uga wareegin Bayern Munich.
Mohammed Kudus ayaa sidoo kale ku biiraya liiska xiddigaha goolasha ka dhaliyey ee ay Liverpool la saxeexatay oo uu ku jiro Takumi Minamino oo waqtigii uu joogay RB Salzburg gool kaga dhaliyey Liverpool garoonka Anfield.
