Jose Mourinho ayaa maanta ka degay waddankiisa Portugal isaga oo qayb ka ah kooxdiisa Roma oo tababar u tagtay garoon ku yaalla dalkaas. Mourinho oo la sheegay in xidhiidhka kubadda cagta Portugal uu doonayo inuu u beddelo Fernando Santos oo Khamiistii is-casilay ayaa garoonka diyaaradaha ee Faro Airport ka degay.
Mourinho oo ah tababaraha reer Portugal ee ugu guulaha badan, isla markaana ku guuleystay siddeed horyaal, laba Champions League iyo koobab kale ayaa sida warbaahinta waddanka Portugal sheegayso waxa uu xidhiidhka kubadda cagta dalkiisu u arkaa shaqsiga ugu habboon ee ay tahay inuu hoggaamiyo dalkiisa.
Markii uu garoonka diyaaradaha ka degay ayaa waxa Mourinho uu koraya baska kooxdiisa Roma oo tababar maalmo kooban ah ku qaadan doonta Portugal. Wariyeyaal badan ayaa markiiba kusoo xoomay Jose Mourinho oo aanay hore ula soconin in uu dalkaas imanayo.
Roma ayaa waxay toddobaadka soo socda ku sugnaan doontaa Portugal oo ay saddex kulan oo saaxiibtinimo ku ciyaari doonto ka hor inta aanay dib ugu laabanin Talyaaniga oo horyaalka Serie A uu sannadka cusub dib uga furmayo.
Wargeyska A Bola ayaa sheegay in xidhiidhka kubadda cagta Portugal uu isku dayi doono inuu Mourinho ku qanciyo inuu kansalo qandaraaska uu kula jiro AS Roma oo soconaya illaa sannadka 2024, haddii se ay u suurtogeli weydo waxay u jeedsan doonaan dhinaca Rui Jorge oo ah tababaraha xulka da’yarta ee Portugal oo lasoo dallacsiinayo.
