Halyeygii hore ee Chelsea ee Joe Cole ayaa saadaal ka bixiyey sida uu noqon doono waayaha ciyaareed ee xiddiga reer Portugal ee Joao Felix oo kaadh casaan ah qaatay ciyaartiisii koowaad ee uu Blues u safto, taas oo ay ka dhalan doonto ciqaab ganaax ah oo uu saddex ciyarood ku maqnaan doono.
Felix ayaa casaan toos ah lagu saaray markii uu qalad ku Kenny Tete oo difaaca uga ciyaara Fulham oo 2-1 ku karbaashtay Chelsea.
Blues ayaa u daadegtay kaalinta tobnaad ee miiska kala-sarraynta kaddib guul-darradan, waxaanay dhibaato kale kusii noqonaysa ganaaxa lagu ridayo xiddiga ay u hanka weynaayeen ee ay ugu badheedheen lacagta badan inay lix bilood kaga bixiyaan ee Joao Felix.
Joe Cole oo ka hadlayay telefishanka BT Sports ayaa ku dooday in Felix uu noqon doono ciyaartoy si fiican u caawiya Chelsea, waxaana uu amaanay sidii uu u ciyaaray muddadii uu garoonka ku jiray kulankii Fulham ee xalay, waxaanu yidhi: “Waxay ila tahay in Joao Felix uu si fiican u ciyaaray. Waan arkay wax ku filan oo aan ku garan karo inuu saxeex wanaagsan u noqonayo Chelsea.
“Waxa uu muujiyey awooddiisa iyo shaqsiyaddiisa laakiin waallida ayaa beddeshay ciyaarta. Felix waxa uu muujiyey in uu isbeddel ku samayn karo shaadhka Chelsea.”
Waxa kale oo isaguna amaanay weeraryahankii hore ee xulka England iyo Liverpool ee Peter Crouch, waxaanu yidhi: “Farsamo ahaan wuu fiican yahay, waxyaabo badan oo la jeclaystana wuu sameeyey, siiba taabashooyinka. Waxa se dhacday waqti waalli ah.”
