Arsene Wenger ayaa weerar ku qaaday xulalka iyo ciyaartoyda ku mashquulay arrimaha siyaasadda ee u ololaynayay qowmu-luudka iyo khaniisiinta, waxaana uu sheegay inay yihiin kuwa ugu liita ee waliba ku fashilmay Koobka Adduunka.
Qatar oo sannadkii 2010 loo doortay martigelinta Koobka Adduunka ayaa waxa weerar ku qaaday saxaafadda, siyaasiyiinta iyo xataa qaar ka mid ah ciyaartoyda reer Galbeedka, kuwaas oo isku dayaya inay waxyeelleeyaan dhaqanka suubban ee seeska ay u tahay Diinta Islaamka ee shacabka reer Qatar.
Kabtannada xulalka waaweyn ee Yurub ayaa waxay hore u shaaciyeen in ay xidhanayaan calaamadda Khaniisiinta oo ay u ololayn doonaan, balse FIFA yaa sheegtay inay ganaaxayso ciyaartoyga sidaa sameeya. Waxa ciyaartoydaas ku jiray kabtanka England ee Harry Kane, kabtanka xulka Germany ee Manuel Neuer, kabtanka Denmark iyo kuwo kale.
Ciyaartoyda xulka qaranka Germany ayaa kulankoodii koowaad ee Koobka Adduunka afka qabsaday iyaga oo diiddan go’aanka FIFA, waxaase ku habsatay guul-darro uu xulka Japan u xambaariyey oo ay isla kulankaas iyaga oo murugaysan ka baxeen garoonka. Ciyaartii xigtayna waxa barbarro ku qabatay Spain, halka kulankii ugu dambeeyey oo kaliya ay ka adkaadeen Costa Rica balse ay wareeggii koowaad si waji gabax ah ugaga hadheen Koobka Adduunka.
Kabtanka xulka England ee Harry Kane ayay isagana ku dhacday abaar dhinaca goolasha ah, waxaana uu goolkiisii koowaad ee Koobka Adduunka dhaliyey xalay, taas oo meesha ka saaraysa hammigiisii ahaa inuu markii labaad ee xidhiidh ah ku tartamo kabta dahabka ah ee Koobka Adduunka ee uu ku guuleystay 2018.
Tababarihii hore e eArsenal oo FIFA u qaabbilsan horumarinta kubadda cagta ayaa sheegay in ciyaartoyda iyo xulalkii ku mashquulay siyaasadda iyo u ololaynta khaniisiintu, in ay ka liitaan ciyaartoyda kale ee Koobka Adduunka, waxaanu yidhi: “Kooxaha bandhigga niyad-jabka ah la yimid kulankoodii koowaad ee Koobka Adduunka, waa kuwii u ololaynayay siyaasadda…. Marka aad tagto Koobka Adduunka, ma aha in aad guul-darraysato ciyaarta koowaad sababtoo ah waxa aad tahay xul khibrad u leh oo natiijooyin ka keenay tartamo hore, sida France, England iyo Brazil.
“Si fiican ayay u ciyaareen kulankoodii koowaad. Waxay ahaayeen kooxo si fiican u diyaarsan maskax ahaan oo yoolkoodu yahay kaliya tartanka, balse aan siyaasad soo bandhigayn.”
Wenger oo u muuqanayay inuu u duur-xulayo Jarmalka ayaa yidhi: “Kooxaha siyaasadda gudbinayay, iyaga ayaa noqday kuwa ugu liitay tartanka Koobka Adduunka.”
