Tababaraha kooxda kubadda cagta Liverpool ee Jurgen Klopp ayaa shaaciyey inuu waligii hal ciyaartoy oo kaliya telefoonkiisa kula galay sawir selfie ah, mana aha ciyaartoyda kooxdiisa ee Mohamed Salah, Virgil van Dijk iyo kuwii uu hore usoo layliyey ee Robert Lewandowski iyo Sadio Mane.
Jurgen Klopp ayaa soo layliyey kooxaha Liverpool oo sannadkiisii toddobaad ku sugan yahay, Borussia Dortmund oo uu toddoba sannadood kusoo qaatay iyo naadiyada Mainz iyo Mets ee horyaalka waddanka Germany ee Bundesliga.
Xiddigo waaweyn ayaa uu soo layliyey muddadaas, hase yeeshee midkoodna telefoonkiisa kulama aanu gelin sawir uu isagu qaaday oo selfie ah, balse waxa jira hal ciyaartoy oo kale oo uu sawir kula galay telefoonkiisa isla markaana uu haysto.
Klopp oo ka jawaabayay su’aalo lagu weydiinayay munaasibad casho ahayd oo ay samaysay jimciyadda Liverpool ayaa waxa la su’aalay haddii ay jiraan ciyaartooyo uu telefoonkiisa sawirro kula galay, waxaanu ku jawaabay: “Hal sawir oo kaliya oo selfie ah ayaa ku jira telefoonkayga, kaasina waa Messi. Ronaldo ayaa sidoo kale qolka ku jira…”
Klopp ayaa dhinaca kale qirtay in uu taageere u yahay Lionel Messi, waxaana mar la weydiiyey midka wanaagsan labadan ciyaartoy sannadkii 2020 uu ku jawaabay: “Aniga ahaan Messi ayaa wanaagsan, laakiin sidoo kale lama dhacsani in ka badan intii aan horeba ula dhacsanaa Ronaldo.
Si kastaba, Lionel Messi ayaa Axaddii waxa uu xulkiisa Argentina u qaaday Koobka Adduunka, waana hammigiisii ugu weynaa iyo koobkii kali ahaa ee ka dhinaa waayihiisa ciyaareed ee uu raadinayay, taas ayaana soo afjaraysa dooddii u dhaxaysay isaga iyo Ronaldo, maadaama aanu laacibka reer Portugal koobkan nasiib u yeelanin.
