Kabtanka xulka qaranka Croatia ee Luka Modric ayaa weerar ku qaadaya garsoorihii xalay hayey kulankii ay kaga hadheen Koobka Adduunka ee Argentina ay ku garaacday 3-0, kaas oo uu rumaysan yahay in uu ku sameeyey caddaalad-darro weyn oo sabab u noqotay in si xun loo garaaco.
Croatia oo sannadkii 2018 tagtay finalka Koobka Adduunka ayaa hadda ku hadhay semi-finalka, waxaanay iska qaban kari waayeen Julian Alvarez oo laba gool ka dhaliyey iyo Lionel Messi oo rikoodhe ku niyad-jabiyey, isla markaana burburiyey difaacooda.
Garsooraha Talyaaniga ah ee Daniel Orsato oo ciyaarta hayay ayaa Argentina u dhigay rikoodhe daqiiqaddii 32aad, kaddib markii uu goolhaye Dominic Livakovic qalad ku galay Julian Alvarez, waxaana gool u beddelay rikoodhahaas Lionel Messi.
Dad badan ayaa dood ka keenay rikoodhahaas, waxaana ka mid ah halyeyga England ee Gary Neville oo sheegay in uu Alvarez ku dhacay goolhayaha oo taagan oo uu waliba lugtiisa jiidhay, waxaana sidaas oo kale rumaysan Luka Modric oo isaguna garsooraha eedayn u jeediyey.
Modric oo la hadlayay warbaahinta TyC Sports ayaa yidhi: “Anigu ma jecli in aan ka hadlo garsooreyaasha laakiin kani waxa uu ka mid ahaa kuwii ugu liitay. Anigu xasuus fiican uma hayo, waana mid musiibo ah. Aniga aragtidayda ma ahayn rikoodhe.
“Ma doonayo in aan eedeeyo Argentina, laakiin rikoodhahaasi wuu na dilay. Hadda waa in aanu soo kabano oo aanu ku guuleysano kaalinta saddexaad.”
Luka Modric ayaa dhinaca kale qirtay in Argentina ay ka fiicnayd, waxaana uu yidhi: “Argentina xaq ayay u lahayd inay guuleysato sababtoo ah way naga fiicnayd, wayna u qalmayeen guusha laakiin waa in arrimahan [qaladka garsooraha] waa in la tilmaamo.”
Waxa kale oo isaguna garsoore Daniele Orsato eedaymo u jeediyey laacibka khadka dhexe uga ciyaara xulka Croatia iyo Chelsea ee Mateo Kovacic oo yidhi: “Rikoodhaha ayaa sababay guul-darradayada.”
