Xiddiga Bayern Munich iyo xulka Senegal ee Sadio Mane ayaa baraha bulshada farriin ugu diray asxaabtiisa xulkaasi ee uu ka maqnaa tartanka koobka aduunka Qatar ka socday.
Senegal oo kasoo gudubtay Group ay kula jirtay Netherlands, Equador iyo Qatar ayaa ugu dambayn xalay wareega 16-ka ku hadhay sababta xulka England.
Mane oo barihiisa bulshada farriin u dhigay asxaabtiisa ayaa u sheegay inay meteleen dhammaan dadka ree Senegal isla markaana ay mustaqbalka sii wadi doonaan raadinta koobab badan.
“Walaalahayga qaaliga ahaw, dadku aad ayay ugu riyaaqsan yihiin safarkiina waxaanad dajiseen quluubta dhammaan Senegalese-ka iyo dhammaan taageerayaasha idinkii calanka qaranka sharaf ku difaacaya” ayuu yidhi Mane.
“Sii wada inaad wax barataan oo nasiib wacan, waxaynu sii wadi doonaa raadinta koobab badan Insha Allah”.
Maqnaanshaha Mane oo 34 gool kusoo dhaliyay 93 kulan oo caalami ah isla markaana laba jeer xiddiga Africa kusoo guuleystay ayaa dhirbaaxo ku ahayd Lions Of Teranga.
Mane ayaa muhiim ka ahaa guushii Senegal ee koobkii Africa ee sanadkii hore isagoo afar gool uga soo dhaliyay tartankaas.
Sadio ayaa ku jiray liiska xulka Senegal ee koobka aduunka ka qayb galaya balse ugu dambayn ayay cadaatay inuusan wax fursad ah u haysan inuu ka qayb qaato tartankaas.
