Jurgen Klopp ayaa sheegay in kooxdiisa Liverpool ay dharbaaxo wajiga kaga dhacday ka dib markii uu Luis Diaz mar kale dhaawacmay.
Xiddiga reer Colombia ayaa garoomada ka maqnaa tan iyo bishii Oktoobar ka dib dhaawac ka soo gaaray jilibka kulankii ay guuldarada kala kulmeen Arsenal.
Wuxuu tababarka ku soo laabtay horaantii todobaadkan ka dib markii ay Reds u safartay Dubai halkaasoo ay uga qeyb galeyso koob saaxiibtinimo.
Si kastaba, waxaa la xaqiijiyay in xiddigii hore ee FC Porto Diaz inuu mar kale dhaawacmay islamarkaana dib loogu celiyay Ingariiska si loo baaro dhaawaciisa.
Jurgen Klopp oo maanta la hadlayay warbaahinta ka dib markii ay kooxdiisa guuldarro 3-1 ka soo gaartay Lyon ayaa sheegay in nasiib xumada kooxdiisa ay weli socoto.
Wuxuu yiri: “Haa, Diaz kuma jiro xaaladii ugu fiicneyd. Way iska cadahay inay niyadjab weyn inoo tahay anaga iyo isagaba.
“Wax dhaawacay ma jirin tababarka kaliya wuxuu dareemay xanuun. Maalintii ku xigtay ma uusan fiicneyn laakiin wuxuu rabay inuu taxadar muujiyo oo la baaro xanuunkiisa, ka dib waxaa soo baxay war dharbaaxo nagu noqday.”
Inkaarta dhaawacyada Liverpool waxaa sii kordhiyay da’ yarka khadka dhexe Harvey Elliot oo isna dhaawac ku baxay kulankii maanta ee ay guuldarada ka soo gaartay Lyon.
Klopp ayaa rajeynaya in xiddigaha ka dhaawacan ay u soo wada laabteen marka xilli ciyaareedka maxaliga uu dib u bilowdo.
Liverpool waxay la ciyaari doontaa Manchester City koobka Carabao Cup ka dib marka laga soo laabto Koobka Adduunka halka kulankooda ugu horeeya ee Premier League ay la dheeli doonaan Aston Villa maalinta Boxing Day.
