Shaqaalaha tababarka Faransiiska iyo shaqaalaha jir dhiska ayaa ku eedaynaya Xiddigaha England ee Koobka Adduunka inay qaadsiiyeen Adrien Rabiot iyo Dayot Upamecano duray ama hargab sababi kara inay seegaan finalka Koobka Adduunka.
Labada xiddig ayaa lagu qasbay inay seegaan guushii 2-0 ee France ay ka gaareen Morocco semi-finalka Koobka Adduunka. Saddex habeen oo kaliya ayaa ka harsan finalka ay la ciyaarayaan Argentina, iyadoo labada xiddig ay tartan ugu jiraan inay taam u noqdaan kulankaas.
Marka laga soo tago guuldaradii 1-0 ee ka soo gaartay Tunisia markaasoo tababare Didier Deschamps uu sameeyay isbedelada, Upamecano iyo Rabiot ayaa ku soo bilowday kulan kasta oo ay u ciyaareen xulka difaacanaya Koobka Adduunka.
Si kastaba ha ahaatee, warbixino kala duwan oo ka soo baxay Faransiiska ayaa sheegaya in durayga ama hargabka ay ka qaadeen qaar ka mid ah ciyaaryahanada Gareth Southgate intii lagu jiray kulankii ay Faransiiska 2-1 kaga badiyeen England.
Sida ay sheegtay beIN Sports, qaar ka mid ah shaqaalaha tababarka xulka France ayaa ku eedeynaya ciyaartoyda England inay sabab u yihiin xanuunka labada xiddig.
Wargeyska La Provence ayaa isna qoraya in shaqaalaha tababarka xulka England ay weydiisteen ciyaartii wareegii 8da ka hor in suxufiyiinta iyo shaqaalaha kale ay xirtaan afdabool, taasoo muujineysa in xanuunka hargabka uu ka dhex jiray ciyaartoyda Ingariiska.
