Manchester united ayaa dalab 60 milyan euro ka gudbin doonta weeraryahanka Faransiiska Randal Kolo Muani sida ay sheegayaan wararka.
Waxaa shaki weyn la gelinayaa mustaqbalka xiddiga ee kooxdiisa Jarmalka ee Eintrach Frankfurt.
Kolo Muani ayaa dhaliyay shan gool islamarkaana caawiye ka noqday 10 gool kale kulamadii uu saftay Bundesliga xilli ciyaareedkan.
Wargeyska Talyaaniga ee Tuttosport ayaa sheegeysa in United ay xiiseyneyso 24 jirkaan islamarkaana ay lacag qaali ah kula soo wareegi doonto bishaan.
AC Milan ayaa sidoo kale muddo dheer xiiseyneysay weeraryahanka halka Bayern Munich la filayo inay u dhaqaaqi doonto saxiixiisa.
♦♦♦♦♦♦♦♦♦♦♦♦♦♦♦♦♦♦♦♦♦♦♦
Manchester United ayaa sidoo kale tartan ugu jirta saxiixa Dusan Vlahovic.
Juventus ayaa kaliya weeraryahanka Serbia la soo wareegtay bishii Janaayo ee sannadkii la soo dhaafay iyagoo Fiorentina uga soo iibsaday 81.6 milyan euro.
Mudadii uu joogay kooxda Talyaaniga wuxuu dhaliyay 16 gool 36 kulan uu saftay tartamada oo dhan.
Laakiin warbaahinta Talyaaniga ee Calciomercato ayaa qoreysa inuu mar kale dhaqaaqi doono iyadoo United ay baadigoob ugu jirto weeraryahan cusub.
Chelsea iyo Newcastle United ayaa sidoo kale la aaminsan yahay inay ku jiraan tartanka saxiixa laacibkaan.
♦♦♦♦♦♦♦♦♦♦♦♦♦♦♦♦♦♦♦♦♦♦♦
Wararka ka imaanaya Portugal ayaa sheegaya in hishiiskii Enzo Fernandez uu ugu wareegayay Chelsea in la dhameystiray oo kaliya ay ka harsan tahay in lagu dhawaaqo.
Chelsea ayaa mar sii horeysay hishiis shaqsi ah la gaartay Enzo Fernandez halka ay sidoo kale miiska soo saareen lacagta lagu burburinayay qandaraaskiisa Benfica ee 105 milyan ginni laakiin caqabada waxay aheyd sida ay Chelsea ku bixin karto lacagta.
Blues ma dooneynin inay lacagta hal mar wada bixiso, waxayna wararku sheegayaan in haatan lagu hishiiyay in Chelsea ay seddex jeer kala bixiso lacagta taas bedelkeedana ay hishiiska ku darto 10 milyan euro oo ku xirnaan doonta qaab ciyaareedka ciyaaryahanka.
♦♦♦♦♦♦♦♦♦♦♦♦♦♦♦♦♦♦♦♦♦♦♦
Chelsea iyo N’Golo Kante ayaa dib u bilaabay wadahadaladii la xiriiray qandaraas kordhinta iyadoo qandaraaskiisa uu dhacayo bisha Juun.
Xaalada ayaa isbedeshay ka dib bilo ay hakad galeen wadahadalada.
Kante ayaa haatan doonaya inuu mushahar dhimis sameeyo madaama uu jecel yahay kooxda.
Wuxuuna rajeynayaa inuu sii joogo Stamford Bridge. Khabiirka suuqa kala iibsiga Fabrizio Romano ayaa sheegay inay haatan boqolkiiba 50 tahay in Kante uu sii joogo Blues.
Hishiisyadii la dhameystiray maanta:
Daafaca dhexe ee Croatia Dejan Lovren ayaa ka tagay FC Zenit isagoo hishiis joogta ah ku wareegay kooxda Faransiiska ee Lyon.
Daaficii hore ee Liverpool ayaa qandaraas labo sannadood ah u saxiixay kooxda Faransiiska isagoo sii joogaya ilaa iyo xagaaga 2025ka.
Kasper Dolberg ayaa hishiis amaah ah ugu biiray kooxda Jarmalka ee Hoffenheim isagoo ka tagay kooxda Faransiiska ee Nice.
Kooxda Bundelsiga ka dhisan waxay qiyaar u leedahay inay si joogta ah u iibsato ciyaaryahanka xaagaaga soo socda.
