Kabtanka Manchester United ee Harry Maguire ayaa laga saaray liiska ciyaartoyda kooxdiisa ee kulanka Manchester Derby ee ay Axadda martida u noqonayaan Man City, waxaana warkan xaqiijiyey tababare Erik ten Hag oo maanta saxaafadda kula hadlayay Carrington.
Maguire oo ay da’diisu tahay 29 jir, isla markaana kaydka ku jiray afartii ciyaarood ee ugu dambeeyey horyaalka Premier League ayaa laga doorbiday Lisandro Martinez iyo Raphael Varane.
Ten Hag ayaa sheegay, in Harry Maguire oo uu dhaawac kasoo gaadhay kulankii xulka qaranka England uu Wembley kula ciyaaray Germany toddobaadkan, in aanu taam ka noqonayn oo uu u jiifi doono in muddo ah, inkasta oo kaliya uu caddeeyey in ciyaarta Man City uu maqnaanayo.
Erik ten Hag oo wax laga weydiiyey xaaladda Harry Maguire ayaa yidhi: “Marka hore, dabcan waa in aan tilmaamo isaga oo aan taageero sababtoo ah waan ku kalsoonahay isaga.
“Waqtigii kulamadii saaxiibtinimo ee ka hor xilli ciyaareedka ee aan la shaqeeyey aad ayuu u wanaagsanaa, tababarka ayuu si fiican u samaynayay waanu dheelayay, xataa marka aanu kooxda ku jirin, waxa uu tayadiisa si fiican ugu muujinayay tababarka.
“Waad aragteen waayihiisa ciyaareed ee min Leicester illaa Manchester iyo xulka England oo uu u saftay 50 ciyaarood, si fiicanna u dheelayay. Qolka labbiska, tababareyaasha iyo ciyartoyduba way ku kalsoon yihiin isaga.”
Isaga oo ka hadlayay dhaawaciisa ayuu yidhi: “Diyaar uma aha ciyaarta Man City, waxa uu dhaawac kasoo gaadhay kulamadii caalamiga ahaa.”
