Halyeeyga England Tony Adams ayaa aaminsan in Harry Kane laga xayuubiyo kabtanimada ka dib markii xulka Ingariiska ay ka hareen Koobka Adduunka – iyadoo bedelkiisa uu durbaba ka tirsan yahay xulka Seddexda Libaax.
Xulka Gareth Southgate ayaa guuldarro 2-1 kala kulmay Faransiiska kulankii wareega sideed dhamaadka.
Harry Kane ayaa gool rigoore ahaa ku barbareeyay goolkii Tchouameni ay France hogaanka ku qabteen, laakiin Olivier Giroud ayaa goolka guusha dhaliyay xilli Harry Kane uu qasaariyay rigoore labaad oo England loo dhigay taasoo xaqiijisay haritaanka England.
Tony Adams ayaa aaminsan in guuldarrada kale ee England soo gaartay ay la micno tahay in loo baahan yahay isbedel lagu sameeyo xulka. Wuxuu u sheegay wargeyska The Sun in Southgate uu u baahan yahay inuu shaqaalihiisa ku soo darsado tababare khibrad ah halka uu sidoo kale ku baaqay in kabtanimada laga xayuubiyo Kane.
“Waxay u baahan yihiin khibrad iyo nin guuleyste ah. Gareth kuma yara dhiiranaanta, laakiin waa guuldareyste fiican. Waa wax ay adag tahay in la sheego balse run ah.” ayuu yiri kabtankii hore ee Arsenal.
“Waxay u baahan yihiin cod kale, shaqsi khibrad leh oo kooxaha waa weyn guulo la soo gaaray kaasoo u sheegi kara waxay u baahan yihiin inay sameeyaan si ay uga gudbaan caqabada heysata.”
Wuxuu Tony Adams ku baaqay in kabtanka xulka England laga dhigo Declan Rice kaasoo sidoo kale kabtan u ah kooxdiisa West Ham United.
Rice ayaa kabtanimada West Ham kala wareegay Mark Noble xagaagii, waana xiddig boos ka helaya England tobanka sannadood ee soo socda.
Adams ayaa hadalkiisa raaciyay: “Waxaan heysanaa ciyaartooy fiican laakiin waxaan ku adkeysanayaa in kabtanka la bedelo. Harry Kane waa lambar sagaal. Waa inaan haatan ka fekerno wixii aan ka sameyn laheyn kabtanimadiisa.
“Waxaan aaminsanahay in Declan Rice laga dhigo kabtanka xulka England.”
