Goolhaye Andre Onana ayaa laga saaray liiska xulka qaranka dalka Cameroon maanta gellinkii hore, kaddib markii ay isku dhaceen tababare Song oo ay isku maan-dhaafeen qaabka loo ciyaarayo. Onana ayaa la sheegay inuu tababaraha si cad uga soo horjeedsaday, sidoo kalena uu kula murmay garoonka tababarka dhaxdiisa.
Samuel Eto’o oo ah guddoomiyaha xidhiidhka kubadda cagta Cameroon ayaa isku dayay inuu dhaxdhaxaadiyo goolhaye Andre Onan iyo tababare Song, hase yeeshee waa uu ku guul-darraystay in uu xal ka dhax dhaliyo.
Andre Onana oo bandhig ciyaareed fiican sameeyey kulankii Switzerland balse goolal laga dhaliyey waqti dambe,a yaa waxa uu gebi ahaanba ka maqnaa garoonka ciyaartii ay maanta Cameroon barbarraha 3-3 ah la gashay Serbia, iyadoo goolhaye Rigobert Song uu go’aan rasmi ah ku gaadhay inuu ka saaro xulka qarankiisa.
Sida uu kusoo warramayo wariye Fabrizio Romano, goolhaye Onana ayaa si rasmi ah looga saaray sarulka qaranka dalkiisa Cameroon, waxaana uu sidoo kale maanta oo Isniin ah isku diyaarinayaa inuu ka dhoofo waddanka Qatar ee uu ka socdo Koobka Adduunka.
Onana oo muddo sagaal bilood ah ganaax kaga maqnaa ciyaaraha kaddib markii isaga oo u ciyaaraya Ajax uu isticmaalay daawooyin xanuun baabi’iye ah oo ay lahayd gabadh ay saaxiibbo yihiin, isla markaana FIFA ku ridday ganaax maadaama ay daawooyinkaasi mamnuuc ka yihiin ciyaartoyda, waxa loo badinayaa in uu u duulayo waddanka Talyaaniga ee ay ka dhisan tahay kooxdiisa Inter Milan.
