Xiddigaha reer Morocco ee wacdaraha ka dhigay Koobka Adduunka ee Sofiane Boufal iyo Azzedine Ounahi ayaa shandaddooda ka xidh-xidhay kooxdooda Angers, kaddib markii ay sumcadoodu sare ugu kacay bandhiggii cajiibka ahaa ee ay ka sameeyeen Koobka Adduunka ee sababay in dalkoodu kaalinta afraad ku dhamaysto.
Ounahi iyo Boufal ayay kooxo badan dalabyo kasoo gudbiyeen iyadoo aanu dhamaanin Koobkii Adduunka ee Axaddii lasoo gabogabeeyey, waxaanay Angers qiratay in hadda ay ku adag tahay inay sii haysato ciyaartoydan.
Wargeyska caanka ah ee kasoo baxa Faransiiska ee L’Equipe ayaa sheegay in maalmaha horyaalka Ligue 1 ay kasii ciyaarayaan Boufal iyo Ounahi ay tirsan yihiin, iyadoo kooxdooduna ay kaalmaha ugu hooseeya ku jiro.
Soufiane Boufal ayaa la sheegay in kooxdiisii hore ee Southampton ay dalab kasoo gudbisay inkasta oo sannadkii 2020 ay iska fasaxday, balse lama sheegin faahfaahinta lacageed ee uu xambaarsan yahay dalabkaas.
Kooxda horyaalka Ligue 1 ee Lille ayaa iyaduna dalab 7 milyan oo GIni ah ka gudbisay Ounahi oo ah ciyaartoyga loogu doonista badan yahay kaddib koobka adduunka, waxayse Angers ku xidhay lacag gaadhaysa 45 milyan oo Gini.
Leicester City ayaa la rumaysan yahay inay mar horeba u gudbisay Angers dalabkeeda qaaliga ah, balse waxa saxeexa laacibkan kula tartamaya Barcelona iyo kooxo kale oo horyaalka Premier League ah.
Ounahi oo laba sannadood ka hor ay Angers kala soo wareegtay naadiga heerka saddexaad ee Faransiiska ee Avranches ayaa la sheegay in qiimaha uu suuqyada ka taagnaa ka hor Koobka Adduunka uu ahaa 2.5 milyan oo Euro, balse hadda uu cirka isku shareeray oo uu 45 milyan oo Gini qiimihiisu marayo.
Ma aha Soufiane Boufal iyo Azzedine Ounahi oo kaliya ciyaartoyda reer Morocco ee saxeexyadooda lagu dagaallamayo, hase yeeshee Amrabat ayaa isagana ay si weyn u doonaysaa Liverpool oo u aragta inuu buuxin doono booska Fabinho oo xilli ciyaareedkan la saluugsan yahay ciyaartiisa.
