Xulka Germany ayay xalay u ahayd habeen madaw isagoo markii labaad ee xidhiidh ah wareega Group-yada kaga hadhay Koobka aduunka walow ay guul 4-2 ah ka gaadheen xulka Costa Rica.
Germany ayaa afar dhibcood ku dhammaystay booska saddexaad ee Group-kooda waxaana farqiga goolasha booska labaad kaga galay dhigooda Spain halka Japan ay booska koowaad ku baxday.
Kulankaas kaddib ayuu qishay weeraryahan Thomas Muller inuu noqon karo midkiisii ugu dambeeyay ee xulkaasi uu mudada dheer soo metelayay.
Muller ayaa sheegay in haddii kaasi ahaa kulankii ugu dambeeyay ee uu dalkiisa u ciyaaray uu u mahad celinayo jamaahiirta ay wakhtiyada kala duwan soo wada qaateen.
“Wakhtiyo badan oo wanaagsan ayaynu soo wada qaadanay, waad ku mahadsan tihiin waxkasta” ayuu hadalkiisa ku bilaabay Thomas.
“Haddii uu kaasi ahaa kulankaygii ugu dambeeyay ee Germany, dhawr eray ayaan leeyahay jamaahiirta Germany, farxad weyn ayay ii ahayd”.
“Aad ayaad u mahadsan tihiin, markasta waxaan isku dayi jiray inaan niyadayda ku muujiyo garoonka, mararka qaar waxa jiray ilin farxadeed, mararka qaar mid xanuun. Waxaan ku sameeyay jacayl, haatan waxaan u baahanahay inaan waxkasta oo kale ka fikiro”.
Muller oo 33 sano jir ah ayaa 44 gool usoo dhaliyay dalkiisa 121 kulan oo uu usoo ciyaaray isagoo qayb muhiim ah ka ciyaaray hanashadoodii koobka aduunka 2014.
