Tababaraha kooxda kubadda cagta Real Madrid ayaa markii ugu horreysay ka hadlay wararka sheegaya in uu iskaga tegi kooxdaas oo uu noqon doono tababaraha cusub ee Brazil ee beddelaya Tite oo is-casilay kaddib markii ay Brazil wareegga siddeedda kaga hadhay Koobka Adduunka.
Carlo Ancelotti oo qandaraaskiisa Real Madrid uu soconayo illaa sannadka 2024 ayaa la sheegay inuu safka hore kaga jiro liiska macallimiinta uu xidhiidhka kubadda cagta Brazil doonayo inuu noqdo tababaraha cusub oo uu hoggaamiyo xulka Brazil.
Isaga oo kooxdiisa u diyaarinaya kulanka horyaalka LaLiga ee Real Valladolid ee toddobaadka dambe, ayaa waxa uu Carlo Ancelotti la hadlay idaacadda waddankiisa Talyaaniga ee Rai Radio 1, waxaana la weydiiyey waxa ka jira wararka sheegaya inuu iskaga tegayo Real Madrid dhamaadka xilli ciyaareedka oo uu noqon doono macallinka cusub ee Brazil.
Ancelotti oo ka jawaabaya su’aashaas ayaa yidhi: “Anigu waxa aan ku noolahay nolol maalinba maalinta xigta [damaanad aan haysan], waxaana jiri doona waqti aan kaga fikiri doono mustaqbalkayga.
“Ma garanayo waxa mustaqbalka aan samayn doono, laakiin hadda waxa aan ku fiicanahay Real Madrid oo aanu xilli ciyaareedkan yoolal badan leenahay. Waxa aan kula jiraa qandaraas illaa June 20, 2024 ah, haddii aanay Madrid i eryin ka hor waqtigaas, anigu meelna tegi maayo.”
Mar la weydiiyey sida uu ahaa koobka adduunka ee xulka Argentina uu ku guuleystay, waxa uu ku jawaabay: “Waxa uu ahaa tartan wanaagsan oo si qurux badan kusoo dhamaaday. Argentina way u qalmaysay in ay ku guuleysato laba sababood dartood; sababtoo ah waxay haystaan ciyaartooyo wanaagsan iyo midka ugu fiican dunida, iyo sababtoo ah tayada ay kusoo kordhiyeen ciyaartoyda cusub sida Julian Alvarez iyo Enzo Fernandez.”
