Goolhayaha xulka Belgium-ka ee Thibaut Courtois ayaa ka hadlay qalalaasaha ka dhex taagan qolka labiska xulkiisa oo banaanka usoo baxay isla markaana saxaafada gaadhay kaddib guuldarradii Morocco kasoo gaadhay dhawaan.
Belgium ayaa qalalaase ku dhex jira iyadoo guuldarrada Morocco kasoo gaadhay ay u dheer yihiin hadal ay qaar kamida xiddigaha waaweyn ee xulkaasi saxaafada isu mariyeen.
Jan Vertonghen, Eden Hazard iyo Courtois ayaa dhammaantood shalay saxaafada la hadlay iyagoo beeniyay inay isku dhaceen balse ay qaateen kulan ay kaga hadlayaan dhibkooda garoonka dhexdiisa.
Hazard ayaa isagoo arrimahaas ka hadlayay yidhi “Wax weyn may ahayn, waxkasta oo la yidhi waa la buunbuuniyay, shalay kulan ayaanu qaadanay wax badana waanu kaga wada hadalnay”.
Dhinaciisa Courtois ayaa sheegay inuusan faraxsanayn balse waxkasta la buunbuuniyay isagoo dhinaca kale ku hanjabay in haddii uu ogaado qofkii warkaas dibada u saaray ee saxaafada u geeyay ay noqonayso maalintiisii ugu dambaysay ee xulka.
“Dad badan ayaanu la shaqaynaa marka ciyaartoyda laga yimaado, laga yaabaa inuu qof wax yidhi. Uma baahnin inaanu raadino qofkii wax yidhi dabcan haddii aanu helno waxay noqon doontaa maalintiisii ugu dambaysay ee xulka”.
