Taageereyaasha xulka qaranka Argentina ayaa naxayt markii ay ogaadeen in finalka Koobka Adduunka uu dalkooda taageerayo habaar-qabaha aanay guuleysanin cidda uu taageero ee Drake oo ah fannaan u dhashay Canada. Jamaahiirta ayaa u malaynaya in ay inkaari ku dhacday xulkooda oo ay guul-darraysanayaan, waxaanay kaga falceliyeen baraha bulshada.
Argentina ayaa Axadda berri waxay waajihi doontaa Faransiiska finalka Koobka Adduunka oo loo sii qurxiyey garoonka cusub ee Lusail Stadium.
Drake ayaa sheegay in uu taageereyo Argentina oo uu waliba rajaynayo in ay ku dabbaal-degi doonaan Lusial Stadium, kaddib markii ay Argentina guul-darraysatay finalkii 2014 oo uu isagu taageerayay.
36 jirkan ayaa muuqaalkiisa markii uu soo dhigay baraha bulshada, waxa si weyn uga falceliyey taageereyaasha kubadda cagta, gaar ahaan reer Argentina oo sheegay inay guul-darraysan doonaan mar haddii uu habaar-qabahani taageerayo.
“Drake ayaa taageeraya Argentina si ay u guuleysato? Haa, Faransiiska ayaa badinaya.” Sidaas waxa soo qoray mid ka mid ah taageereyaasha kubadda cagta.
Mid labaad ayaa isaguna soo qoray: “Drake ma waxa uu habaarkiisii keenay Argentina?!”
Taageere saddexaad ayaa isaguna soo qoray: “Drake waxa uu ku khamaarayaa in Argentina ku guuleysan doonto Koobka Adduunka… Habaarkii Darake ayaa ku dhacaya, mar kale ayaanay dhibbaneyaal noqon doonaan.”
Drake ayaa waxa uu hore u taageeray Israel Adesanya ciyaar feedh ahayd oo uu la dheelayay Alex Pereira isaga oo waliba dhigtay khamaar £1.2 milyan oo Ginii ah balse waa laga badiyey.
