Erling Haaland ayaa cadeeyay in Premier League uusan ka adkeyn horyaalada kale ka dib markii uu seddexleydiisii afaraad ee xilli ciyaareedkan uu ku caawiyay Man City inay 3-0 ku garaacdo Wolves iyagoo labo dhibcood u jirsaday kooxda hogaanka heysa ee Arsenal.
Haaland ayaa durba maraya 25 gool uu ka dhaliyay horyaalka Premier League, waana in ka badan labo gool goolashii ay Mohamed Salah iyo Heung-min Son ay ku qaadeen kabta dahabka xilli ciyaareedkii la soo dhaafay, waxaana la marayaa kaliya bisha Janaayo.
Waa xiddigii ugu horeeyay abid ee 19kiisii kulan ee ugu horeysay Premier League ku dhaliya afar seddexleey, waxa uu jabiyay rikoodhkii Ruud van Nistlerooy oo afar seddexleey ku dhaliyay 65tiisii kulan ee ugu horeysay.
Wolves nasiib ayay ku laheyd in gool kaliya lagu marsiiyo qeybtii hore ee ciyaarta madaa Man City ay kubada iska heysatay.
Erling Haaland ayaa hogaanka u dhiibay dhamaadkii qeybta hore ka dib markii uu madax ku dhaliyay karoos uu u soo dhigay Kevin de Bruyne.
Dhamaadkii qeybta hore City ayaa heshay fursado ay hogaanka ku sii dheereysan kartay iyadoo Grealish uu u dhawaaday shabaqa halka Collins uu sameeyay difaacasho adag.
Seddex daqiiqo markii ay socotay qeybtii labaad ee ciyaarta Man City waxaa loo dhigay rigoore markii uu Neves cirbaha isagu dhuftay Gundogan.
Waxaa rigoorada u soo istaagay Erlind Haaland oo dhaliyay goolkiisii labaad ee ciyaarta.
Daqiiqadii 53aad Erling Haaland ayaa dhameystirtay seddexleydiisa ka dib hadiyad ay Man City ka heshay Wolves. Sa ayaa kubad toos ugu baasay Mahrez kaasoo isna u dhigay Haaland oo si aayar ah shabaqa ugu taabtay.
Waxa uu goolkaas ahaa goolkiisii 25aad ee xilli ciyaareedkan uu ka dhaliyo Premier League isagoo saftay kaliya 19 kulan.
Mahrez ayaa isna markiisa shabaqa soo taabtay qeybtii labaad laakiin goolkiisa waxaa loo diiday inuu offside ahaa.
Ciyaarta waxay ku soo dhamaatay 3-0 oo ay Man City ku xaaqday Wolves waxayna labo dhibcood u jiraan kooxda hogaanka heysa ee Arsenal inkastoo ay labo kulan sii hor ciyaareen.
