Liverpool ayay muddo kale kasii maqnaan doonaan xiddigaha ay aadka u tabtay ee Luis Diaz iyo Diogo Jota oo ay soo gaadheen dhaawacyo ay bilo kaga maqnaanayaan garoomada.
Xiddigahan afka hore ayaanu Jurgen Klopp ku xisaabtami doonin waqtiga ugu mashquulka badan ee uu dib u bilaabmayo horyaalka Premier League, laakiin waxa kala duwan xilliga ay soo laabanayaan ee ay shakhaatiirtu shaaciyeen haddii aanu isbeddel kale ku iman.
Luis Diaz ayaa uu dhaawac soo gaadhay bishii October halka Diogo Jota uu maalmo ka hor Koobka Adduunka ku habsaday dhaawac xanuun badan oo garoonka laga dhax qaaday.
Klopp oo ay kooxdiisu ku jirto kaalinta lixaad, ayaa waxa uu horyaalka dib u bilaabanayaa Isniinta iyadoo ay ka maqan yihiin labadan ciyaartoy ee muhiimka ah.
Goorma ayay soo laabanayaan?
Diaz ayaa horeba ugu soo noqday garoomada oo soo dhamaystay saddex bilood oo loo qabtay bishii October hase yeeshee mar kale ayuu dhaawac kasoo gaadhay tababarkii ay toddobaad ka hor kooxdiisu ku samaynaysay magaalada Dubai.
Xiddiga reer Colombia ayaa la xaqiijiyey inuu saddex bilood oo kale jiifi doono taas oo ka dhigan in illaa bisha saddexaad ee sannadka ama March uu ka maqnaanayo kooxdiisa.
Garabka bidix ee weerarka ee uu Diaz ka ciyaari jiray ayay Liverpool la’dahay ciyaartoy u buuxiya, waxaana muddooyinkii dambe lagu tijaabinayay Darwin Nunez oo isaguna aan sidii laga doonayay uga shaqaynayn halkaas.
Qalliin cusub oo jilibka ah oo lagu sameeyey Diaz ayaa ka dhigaya in marka uu soo laabto bisha March uu u baahan doono waqti uu dib ugu helo qaab ciyaareedkiisa maadaama uu ku dhowaad lix bilood ka maqnaanayo garoomada isku-darka dhaawaciisii hore ee October illaa waqtiga dambe ee uu soo noqonayo ee March.
Diogo Jota oo isagana uu dhaawacu kasoo gaadhay ciyaartii Man City ee Etihad Stadium oo dhamaadkeedii laga dhax qaaday garoonka, ayaa la filayaa in uu soo noqdo dhamaadka bisha January ee foodda inagu soo haysa ama horraanta bisha xigta ee February.
Si kastaba, Jurgen Klopp ayaa ku ducaysanaya inay hore ugu soo kabtaan labadan ciyaartoy ee muhiimka ah maadaama ay kaalinta lixaad fadhiyaan oo ay 15 dhibcood ka hooseeyaan Arsenal oo hoggaanka haysa.
