Manchester City iyo Liverpool ayay indhuhu kusii jeedaan caawa, waxaanay taageereyaashu sugayaan inay arkaan sida uu noqon doono xafiiltankoodu iyo midkooda u gudbi doona wareegga siddeedda, inkasta oo labada naadi ay isku dayayaan inay hoos u dhigaan cadaawaddii sii kordhaysay ee sannadihii ugu dambeeyey u dhaxaysay.
Liverpool oo difaacanaysa koobka ayaa Etihad Stadium ku booqanaysa Manchester City oo ay dersin ciyaartooyo ah ka maqan yihiin, waxaanay midkood ku biiri doontaa toddoba kooxood oo mar hore wareegga afraad kasoo gudbay.
Charlton Athletic ayaa ah kooxda kaliya ee aan Premier League ka ciyaarin ee usoo gudubtay wareegga siddeedda, kaddib markii ay xalay rikoodheyaal ku garaacday Brighton, balse waxa xaqiiqo ah inay tahay naadiga ay kooxaha oo dhan ku ducaysanayaan ee ay doonayaan inay la dheelaan wareegga xiga.
Manchester United, Leicester, Newcastle, Nottingham Forest, Southampton, Wolves iyo Charlton Athletic ayaa ah kooxaha illaa hadda soo gudbay, waxaana kaliya la sugayaa inay soo kala baxaan City iyo Liverpool si tiradu u buuxsanto.
Goorma ayaa la samaynayaa isku-aadka wareegga siddeedda?
Saacado kooban ayaa inaga xiga xilliga isku aadka, waana caawa oo ay taariikhdu tahay December 22. Marka ay dhamaato ciyaarta Man City iyo Liverpool ayaa la samayn doonaa isku-aadka oo ku beegan saqda dhexe ee caawa.
Lambarrada kooxaha ee isku-aadka ay ku guleyaan
Siddeed kubbadood oo yaryar oo ay lambarro ku qoran yihiin ayaa la kala siinayaa labada kooxood, balse illaa hadda EFL ma aanu shaacin lambarrada kooxaha, waxa se ay soo bixi doonaan mar dhow.
Goorma ayaa la ciyaari doonaa finalka Carabao Cup?
Waqti hore ayaa lasii qorsheeyey taariikhda la ciyaarayo finalka FA Cup, waana mid naadiga ku guuleysta siin doona shidaal ay ku dagaallamaan muddo saddex bilood ah.
Axadda, February 26 ayaa la dheeli doonaa finalka Carabao Cup, xilli ay saacadda Geeska Afrika tahay 7:30pm, Garoonka qaranka ee Wembley ayaa lagu ciyaari doonaa.
