Qaar ka mid ah taageerayaasha kubada cagta ayaa ku doodaya inay aheyd in la diido goolkii seddexaad ee Argentina ee uu dhaliyay Lionel Messi.
Lionel Messi ayaa goolkiisii labaad dhaliyay isagoo ciyaarta ka dhigay 3-2 daqiiqadii 108aad ee ciyaartii finalka, wuxuuna xariiqda goolka dhaafiyay kubad uu Hugo Lloris ka soo bixiyay Lautaro Martinez.
Goolka waxaa looga shakiyay inuu offside ahaa laakiin ku celiskii la daawaday ayaa muujinaya in Varane uu offside-ka ka saaray Martinez. Daafaca Faransiiska Jules Kounde ayaa isku dayay inuu kubada bixiyo laakiin waxay aheyd xilli ay kubadu dhaaftay xariiqda goosha.
Laakiin muranka halkaas kama jiro. Daawadayaasha ciyaarta ayaa arkay in qaar ka mid ah ciyaartoyda keydka Argentina inay garoonka ku dhex jireen ka hor inta aysan kubada dhaafin xariiqda goosha, waxayna aaminsan yihiin inay taasi goolka ka dhigeyso wax kama jiraan.
Dad badan ayay la yaab ku noqotay in VAR aysan si dhow u eegin ciyaartoyda keyd ee garoonka ku jirtay markii uu Messi goolka dhalinayay.
Sharciga kubada cagta ee IFAB ayaa dhigaya: “Garsooraha waa qasab inuu diido gool haddii shaqsi dheeri ah uu garoonka ku jiro, shaqsiga dheeriga ah waa ciyaaryahan keyd ah, ciyaaryahan la bedelay, ciyaaryahan casaan la siiyay ama mid ka mid ah shaqaalaha kooxda goolka dhalisay; ciyaarta dib ayaa loo bilaabayaa iyadoo laad aan toos aheyn la dhigayo booskii uu shaqsiga dheeriga ah garoonka ka soo galay.”
Sharciga ayaa sido kale dhahaya: “Haddii goolka la dhaliyo oo ciyaarta ay dib u bilaabato islamarkaana garsooraha uu markaas ogaado in shaqsi dheeri ah uu garoonka ku jiray markii goolka la dhalinayay, markaas goolka lama diidi karo.”
France ayaa daqiiqado ka dib barbareysay ciyaarta marki Kylian Mbappe dhameystirtay seddexleydiisa taasoo aheyd rigooradiisii labaad markii Gonzalo Montiel laga dhigay kubad uu gacanta ku taabtay.
Laakiin Montiel ayaa noqday geeska Argentina isagoo dhaliyay rigooradii guusha ee ay koobka ku qaadeen.
