Goolhayaha xulka Koobka aduunka ku guuleystay ee Emiliano Martinez ayaa halkiisa kasii wada inuu ku maadsado weeraryahanka xulka France ee Kylian Mbappe.
Martinez ayaa markan la arkay isaga oo Boombalo ilmo yar ah kusoo xidhay wajiga Mbappe intii uu socday dabaaldegii xiddigaha Argentina ay baska furan ku dhex marayeen caasimada dalkooda ee Buenos Aires.
Arrinta sii xumaynaysa waxkasta ayaa ah in Martinez marka uu boombalada gacanta ku hayo uu garab joogo Lionel Messi oo ah kabtankiisii celin lahaa oo ay intaas u raacdo inay Mbappe PSG ka wada tirsan yihiin.
Martinez ayaa aad muhiim ugu ahaa guushii Argentina ee Koobka aduunka isagoo daqiiqadii ugu dambaysay ciyaarta gool uu kula soo baxay ka beeniyay da’yarka Kolo Muani halka uu markii dambe rigoorayaasha kasoo dhalaalay.
Balse Mbappe ayuu la tacaali kari waayay Finalkaas 30 sano jirka Aston Villa iyadoo xiddiga Paris uu afar jeer shabaqiisa taabtay marka xataa rigoorihii dambe lagu daro.
Labada xiddig ee dhammaadkii ciyaarta si fiican sawir u wada galay iyagoo gacanta ku haysta abaalmarinaha ay kusoo guuleysteen.
Laakiin Martinez ayaa isla qolka labiska ka dhex bilaabay ku maadsiga Mbappe oo uu mid meyd ah ku tilmaamay.
