Tababaraha kooxda Barcelona ee Xavi Hernandez ayaa maalmihii ugu dambeeyay ku qaadanayay dalka Qatar isagoo ku raaxaysanayay halkaas daawashada koobka aduunka kahor inta aysan shaqada kooxdiisu Isniinta dib u bilaabmin, dhinaca kale Xavi ayaa daawashada ciyaartoy cayiman u tagay halkaas.
Mid kamida kulamada Hernandez daawaday ayaa ahaa kulankii dhex maray xulalka Germany iyo Spain ee 1-1 kusoo dhammaaday, soo laabashadiisa ayay warbaahintu sheegaysaa inuu soo helay bedelka kabtan Sergio Busquets haddii uu kooxda ka tago dhammaadka xilli ciyaareedkan.
Sida uu sheegayo wargeyska Sport, khadka dhexe ee Man City ee Ilkay Gundogan ayaa ah xiddiga uu Xavi doortay xilli isagana heshiiskiisa Etihad Stadium yahay mid dhacaya.
City ayaa doonaysa inay heshiis hal sano ah u bandhigto balse sidoo kale mahor istaagi doonto haddii uu bixitaan dalbado.
Inuu yahay mid caqli badan, boosas badan dheeli kara isla markaana khibrad leh ayaa soo jiidatay Xavi, Gundogan maaha dookh ay mudo dheer oo dambe ku tashanayso Barcelona oo waa 32 sano jir balse wuxuu u muuqdaa xalka ugu macquulsan ilaa haatan.
Dookhyada kale ee ah Martin Zubimendi iyo Ruben Neves oo Real Sociedad iyo Wolves ka tirsan ayaa iyagu u baahan doona lacag badan si ay kooxdu ula saxeexato.
