Xulka qaranka Ghana ahaa guushiisii koowaad kasoo hooyey Koobka Adduunka, waxaanay 3-2 ku garaaceen Koonfur Korea kulan aad u xiiso badnaa oo qaybtii horeba ay shaqaysteen Xiddigaha Afrikaanka ee Ghana.
Laba gool oo uu u dhaliyey Mohamed Kudus labadii qaybood ee ciyaarta iyo aftax wanaagsan oo uu kulanka ku furay Mohamed Salisu ayaa xulka Ghana siiyey guul qurux badan oo ay si adag u shaqaysteen, iyadoo Koonfur Korea laba gool oo qaybtii labaad ay israacisay ay guul-darro ka badbaadinkari waayeen.
Xulka Korea ayaa ciyaarta ku bilowday cadaadis badan oo uu saaray Chana, iyaga oo isku dayayay inay waqti horeba kaga nixiyaan goolal, hase yeeshee Ghana ayaa soo bandhigay caiyar qaan-gaadh ah oo dheeli-tiran, iskuna xidhiidhsan min difaac, khad dhexe illaa weerarka.
Daqiiqaddii 21aad ayuu Mohamed Salisu hoggaanka u dhiibay xulka qaranka Ghana, isaga oo karoos halis ahaa oo uu soo dhiibay Jordan Ayew ku leexiyey goolka. Lugta bidix ayuu Salisu ku dhamaystiray kubaddaas.
Mohammed Kudus ayaa gool labaad raaciyey daqiiqaddii 34aad isaga oo madax ku qabtay kubbad uu dhinaca bidix kasoo qaaday Ayew, taas oo uu goolhayaha Koonfur Korea ee Kim Seung Gyu awoodi waayey inuu joojiyo, iyada oo meel aan ka fogeyn ka haleeshay shabaqa, waxaanay qaybta hore kusoo dhamaatay 2-0 ay hoggaanka ku haysay Ghana.
Markii lagu soo noqday qaybta labaad ayay xulka Koonfur Korea muujiyeen isku-duubni iyo ciyaar aan baqasho lahayn oo isku xidhan, waxaanay weerarro joogto ah oo aan kala joogsi lahayn ku ekeeyeen goolka Ghana, hase yeeshee xiddigaha madow ee Afrikaanka ayaa iyaguna raadsanayay fursaddooda oo si aan cabsi lahayn isku difaacayay.
Laba gool oo daran-doorri ah ayay xulka Koonfur Korea la yimaaddeen daqiiqadihii 58aad iyo 61aad, waxaana madax ugu dhaliyey Jo Gue-sung, kuwaas oo dib usoo nooleeyey fursadda ay guul ku raadinayeen xiddigaha Koonfur Korea.
Mohamed Kudus ayaa dib ugu soo celiyey hoggaanka xulka dalkiisa Ghana daqiiqaddii 68aad, waxaana uu mar kale shabaqa ku hubsaday kubbad uuka helay Inaki Williams.
Dhamaadkii ciyaarta ayuu goolhaye Lawrence Ati Zigi badbaadiyey dhawr kubbadood oo halis ahaa oo lagaga toogtay meelo tallaabooyin u jira, waxaanay ciyaartu kusoo dhamaatay 3-2 ay guushu ku raacday Ghana.
