Gary Neville ayaa wajigabax la kulmay ka dib markii la ogaaday in shaqaalaha huteelkiisa raaxada inay ku shaqeeyaan lacagta ugu yar ee Ingariiska looga shaqeyn karo taasoo ku filneyn inay noloshooda ku maareeyaan.
Xiddigii hore ee Manchester United oo isku bedelay falanqeeye kubada cagta ah ayaa iska leh huteelka Stock Exchange ee magaalada Manchester, waxaana la ogaaday in shaqaalaha huteelka inuu siiyo saacadii 9.50 ginni waa in ka yar 10 ginni waana lacag aad uga hooseysa lacagta uu shaqsi ku noolaan karo gudaha UK.
Dadka lacagtaas ku shaqeeya waxay ku qasban yihiin inay raadsadaan shaqo kale si ay noloshooda u maareeyaan una helaan adeegyada ay u baahan yihiin sida cuntada, kirada, korontada iyo wixii la mid ah.
Arintaan ayaa imaaneysa ka dib markii Neville uu dhowr jeer ku celceliyay sida ay dowlada Qatar u la dhaqmeyso shaqaalaha wadankeeda isagoo sheegay xuquuqdoodii la duudsiiyay sida inay lacago yar ku shaqeeyaan iyo in goobahooda shaqada aysan aheyn kuwa amaan ah.
Wuxuu sidoo kale dhawan dowlada Ingariiska ku eedeeyay inaysan mushaharka u kordhinin kaalkaaliyayaasha caafimaad oo sannadkii qaata celcelis ahaa 34 kun ginni halka shaqaalaha Neville ee huteelkiisa ay sannadkii qaataan 19,600 ginni iyagoo todobaadkii shaqeynaya 40 saacadood.
Neville ayaa lagu eedeeyay labo wajiilenimo iyo inuu iska indhotiraya dhibaatada uu isaguba qeybta ka yahay, waxaana loogu baaqay inuusan cunaha ku dhegin shaqaalihiisa oo uu siiyo lacag fiican madaama uu yahay milyaneer ganacsiyo badan leh.
Dowlada Qatar ayaa sheegtay inay wax badan ka qabatay dhibaatooyinkii lagu kala kacayay shaqaalaha wadankooda jooga sida in haatan loo ogolaaday in baasabooradooda la siiyo oo ay u shaqeyn karaan cidii ay doonaan islamarkaana mushaharkooda sarre loo qaaday.
Xaalada shaqaalaha Qatar ayaana aad uga fiican sidii aheyd 12 sannadood ka hor markii ay ku guuleysanayeen martigelinta Koobka Adduunka sida ay sheegeen hay’ado badan oo arimaha shaqaalaha u olaleeya.
