Garsoorihii hayay ciyaartii finalka Koobka Adduunka ee Szymon Marciniak ayaa sheegay inuu sameeyey hal qalad oo kaliya 120 daqiiqadood uu dhax-dhaxaadinayay Faransiiska iyo Argentina, kuwaas oo markii dambe ku kala baxay rikoodheyaal ay Argentina guushu ku raacday.
Szymon Marciniak ayaa noqday garsoorihii ugu horreeyey ee reer Poland ah ee qabta ciyaar finalka Koobka Adduunka ah, waxaana uu galay taariikhda dalkiisa, hase yeeshee taageereyaasha ayaa ku kala aragti duwanaaday go’aamadiisa qaarkood.
Taageereyaasha badankooda ayaa ku qanacsanaa sida uu Marciniak uga garnaqay ciyaartaas 120kii daqiiqadood ee ay socotay, balse jamaahiirta Faransiiska ayaa ku andacooday in goolkii Lionel Messi uu qalad ahaa inkasta oo taas beddelkeeda uu garsooruhu ku dooday in goolkii Mbappe ee dambe ay isku marxalad ahaayeen.
41 jirkan oo waraysi bixiyey ayaa waxa uu sheegay in kaliya uu sameeyey hal qalad oo ahaa in uu ciyaarta joojiyey markii Marcus Thuram qalad lagu galay iyadoo kubaddana ay haystaan ciyaartoyda Faransiisku, waxaana uu tilmaamay inay fiicnaan lahayd in aanu joojin ciyaarta maadaama ay saaxiibadii kubadda haysteen.
“Waxa aan ka baqay in qaladkaas uu ciyaartoygii qaladka lagu galay uu doonayay in ciyaarta loo joojiyo, si qaldan ayaan wax u akhriyey sababtoo ah waxba ma dhicin. Waxay ahayd in aan usii daayo ciyaarta ‘advantage’ kaddibna aan kaadhka mar dambe siiyo.
“Way adkayd. Ciyaar sidan oo kale ah, waxa aan qaladkaas oo kale u qaadanayaa bar madow, waxa se muhiimka ah waxay ahayd in aanay jirin qaladaad waaweyn.”
