FIFA ayaa toddobaadkii hore shaacisay in ciyaarta finalka Koobka Adduunka ee maanta uu qaban doono garsooraha reer Poland ee Szymon Marciniak, iyadoo gurigiisa loo diray Anthony Tylor oo la filayay inuu noqon doono midka ciyaartan dhexdhexaadin doona, sababtuna waa in colaad guun ahi ka dhaxayso Ingiriiska iyo Argentina.
Szymon Marciniak oo ay da’diisu tahay 41 jir ayaa noqon doona mid ay maanta indhaha dunidu si weyn u hayaan, laakiin waxa saacado ka hor bilowga ciyaarta dibedda usoo baxday xogta wadne xanuun kusoo booday iyo in uu aflagaadeeyey garsoore oo casaan la siiyey xilliyadii uu ciyaartoyga ahaa.
Saxaafadda ayaa uu la hadlay Szymon Marciniak, waxaana uu daboolka ka qaaday kaddib markii uu qabtay kulankii PSG ay 4-0 ku xasuuqday Barcelona sannadkii 2017, sidoo kalena uu kulamo ka qabtay Euro 2020, in uu ku dhacay wadne xanuun.
“Waqti adag ayaa isoo maray sannad iyo badhkii u dambeeyey. Waxa igu dhacay Tachycardia, waana xanuun wadnaha ah. Bilowgii, aad ayay iigu adkayd waanan joojiyey shaqada. Waxa aan seegay kulamo tartankii qaramada Yurub ah, waxay ii ahayd dareen aad u xun. Laakiin mararka qaarkood noloshu way isbeddeshaa, waxaana kuu soo laabata farxaddii oo laba-jibbaaran.” Ayuu yidhi Szymon Marciniak.
“Hadda waxa aan dareemayaa in aan fiicanahay sababtoo ah wax badan ayaan qoomamaynayaa. Noloshu dib ayaay iigu soo noqotay, qosolkana ma joojiyo sababtoo ah waxa aan dareemayaa fiicnaan.”
Pierluigi Collina oo ah ruug-caddaagii garsoorka ee Talyaaniga oo ah madaxa farsooreyaasha FIFA ayay saaxiibbo dhow yihiin Marciniak, isaga ayaana u doortay in uu noqdo garsooraha ciyaarta finalka Koobka Adduunka.
Waxa kale oo uu Marciniak ka sheekeeyey xilligii uu ciyaartoyga ahaa iyo sidii uu garsooreyaasha u aflaadayn jiray, waxaanu yidhi: ‘Waxa aan ahaa ciyaartoy si fiican usoo baxaya sida ay tababareyaashaydii ii sheegeen, laakiin casaan ayaa la isiiyey markii aan ciyaartoy xagga dambe kaga imid ee aan qalad ku galay. Waxa aan bilaabay in aan la murmo garsooraha, aniga ayaa doonayay in casaan la siiyo ciyaartoyga iga soo horjeeday, laakiin garsooruhu iguma raacin.”
Marciniak ayaa sidoo kale qirtay inuu kaadh casaan ah ku qaatay garsoore uu ku aflagaaddeeyey garoonka dhaxdiisa ka hor intii aanu soo gaadhin dhaawac halis ahaa oo sababay inuu ciyaaraha ka fadhiisto.
